Skontra editen ‘Semeya de la rabia’ en vinilu

La banda punk-folk Skontra ta acabante d’editar en vinilu ‘Semeya de la rabia‘, el so primer discu. Publicáu en 2006, esti trabayu discográficu contién dalgunes de les canciones más icóniques del grupu como “Y sigo en pie”, “En tu honor” o “Güei ni ayeri”. Agora lu asoleyen en formatu vinilu de 180 gramos con un carpeta qu’inclúi les lletres y una adaptación del diseñu que ficiera orixinalmente’l cantante de La Tarrancha y diseñador gráficu Delfín Valdés.

La publicación d’esti LP -que yá ta a la venta en musicasturiana.com por un preciu de 15 euros- ye parte de les acciones coles que’l grupu xixonés ta cellebrando’l 20 aniversariu. Amás, el próximu sábadu 7 de mayu van volver a xubir a los escenarios dempués de más de dos años de parón por culpa l’andanciu. El conciertu va ser a les 21h na sala Sir Laurens d’Uviéu y nél van tar acompañaos de la banda punk-rock madrilana No Konforme. Los próximos conciertos que tienen confirmaos son el 1 de xunetu nel prestixosu Resurrection Fest de Viveiro y 2 de xunetu nel Maizu Rock d’Intriago.

Skontra ye ún de los grupos n’activo más veteranos de la escena de rock n’Asturies. Formaos en Xixón en 2001, lleven tou esti tiempu faciendo punk-folk pero, en cuenta de beber de los sones celtes d’Escocia o Irlanda, ellos miren pa casa y componen les sos canciones partiendo de la tradición sonora asturiana. Con lletres reivindicatives tanto n’asturianu como en castellanu, tienen cuatro discos publicaos y son una de les bandes que más kilometros percorrió, representando a la cultura asturiana nos principales festivales rockeros del Estáu y faciendo dos xires per Países Baxos y Alemaña.

Mercar discos de Skontra na tienda online