Susana Sela y Luis Núñez asoleyen ‘Viaxar con poco pesu’
Yá ta a la venta en musicasturiana.com y en toles plataformes dixitales Viaxar con poco pesu, el primer llarga duración que firmen conxuntamente la escritora Susana Sela y el músicu Luis Núñez. Tres llanzar dellos singles a lo llargo l’añu, publiquen agora los diez cantares que dan forma a esti álbum nel que suenen xéneros como’l folk, pop, jazz, rock o spoken word enriba de los poemes y la voz recitada de Susana Sela.
«Los dos entamamos a trabayar xuntos y descubrimos una forma distinta de tresmitir los mios poemes. La música fáilos volar, pero nun ye una base con cuatro acordes mentanto recito ensin más. Non. Son canciones, diferentes, pero canciones», desplica Susana Sela sobre esti discu que va más allá de los clásicos spoken word. La escritora esclaria que la so poesía «tien munches capes» y que-y presta pola vida «crear atmósferes distintes y facer que’l públicu les faiga suyes y esperimente les sos propies sensaciones», asina ye como esti trabayu diversu y orixinal da cuenta d’ello.
