El FIG avanza una programación mui completa pal so quince aniversariu

Esti 2022 el Festival Internacional de la Gaita de Villaviciosa (FIG) cumple 15 años y pa cellebralo ta avanzando a traviés de les sos redes sociales una programación enllena d’actividaes pa los díes 1, 2, 3 y 4 de setiembre. Actuaciones de bandes de gaites y bandines, conciertos folk, pandereta y baille, talleres y ponencies, son dalgunos de los actos presentaos por esti festival entamáu pola Banda de Gaites Villaviciosa-El Gaitero y qu’esti añu recupera la so esencia dempués de facer el DesconFIGnamientu Fest per dos años a cuenta l’andanciu.

Pal xueves 1 de setiembre yá ta confirmáu ún de los conciertos más atractivos del programa, el de DRD. Esti tríu de folk de cámara formáu por Dolfu R. Fernández (vigulín y voz), Rubén Bada (buzuqui y guitarra) y Borja Baragaño (flauta y gaita) vuelve dempués de dellos años ensin tocar en directo y el so conciertu nel FIG va ser l’estrenu d’un regresu esperáu polos amantes del xéneru.

La pandereta y el baille tradicional garren fuercia na programación pal vienres 2 coles actuaciones de les Pandereteres de Fitoria y Los Xeitosos, la formación de pandereteros del Grupu de Baille Tradicional Xeitu. Tamién les bandines van tar presente esi día. La carbayona Orquestina La Xarangana y el quintentu astur-bretón La Banda… LATIRA! van poner a la capital maliaya a baillar.

Pal sábadu 3 de setiembre ta anunciada la participación de la Banda Gaites El Gumial de Morea (Ayer) y de la Banda Gaites Xácara (Uviéu). Amás, va haber conciertu internacional cola actuación de John McSherry Trio, formación d’esti míticu gaiteru irlandés fundador de Lúnasa, ente otros proyectos. Per otru llau, pal domingu 4 les bandines vuelven a enllenar esti avance de programación col anunciu de l’actuación de Los Gascones y La Garrapiella; esta última presentando’l so primer llarga duración.

Ponencies, talleres y camisetes

El Festival Internacional de la Gaita de Villaviciosa tresciende de les actuaciones musicales y por eso les ponencies y talleres rellacionaos con esti instrumentu tienen tamién protagonismu na programación. Pel momentu, tán confirmaes les ponencies de Rodrigo Joglar La Gaita n’Asturies: del Gaiteru Lliberdón al Conservatoriu (xueves 1) y de Dani García de la Cuesta Gaites y Dances n’Asturies dende’l S. XII (domingu 4); y el taller Afinación y puesta a puntu de la gaita impartíu por Pelayo Fernández. Tamién el festival ta acabante sacar unes camisetes pol so 15 aniversariu pa que la xente puea collaborar económicamente con esti festival gratuitu.

Comprar discos de gaita na tienda online