Güei, vienres 7 d’agostu, ye l’últimu día pa que proyectos musicales asturianos puedan presentar la so candidatura pa participar en Showcase Scotland 2027, el principal alcuentru profesional de música folk y tradicional que se celebra nel marcu del festival Celtic Connections, en Glasgow (Escocia). La iniciativa ponla en marcha la Conseyería de Cultura, Política Llingüística y Deporte y surde gracies a qu’Asturies va ser el país convidáu de Showcase Scotland na edición del añu qu’entra.
Les persones y formaciones interesaes pueden presentar la so candidatura al traviés del formulariu habilitáu, nel siguiente enllaz: https://forms.cloud.microsoft/e/Y2GgME8RJV. En cuantes remate’l plazu, les solicitúes van unviase a la dirección artística del eventu, que ye la encargada d’escoyer los seis proyectos que van actuar en Glasgow ente’l 20 y el 24 de xineru de 2027, dientro de la programación oficial del festival. La Conseyería de Cultura nun va intervenir na valoración artística nin na selección final, que va corresponder esclusivamente a la organización del certame.
Caún de los proyectos escoyíos va poder ufrir una actuación d’unos quince minutos dientro de la programación oficial del Showcase Scotland 2027, un formatu concebíu pa presentar el so trabayu énte profesionales, festivales y programadores internacionales de la escena folk y de músiques de raigañu. Asina favorécense oportunidaes nueves pa la música asturiana nun eventu que constitúi ún de los principales escaparates internacionales d’esta escena, axuntando cada añu a representantes de numberosos países.
El festival celébrase en Glasgow, reconocida pola UNESCO como Ciudá de la Música, un distintivu que respuende al so compromisu cola creación, la diversidá cultural y la protección del patrimoniu musical como elementu central de progresu y dinamismu. El Celtic Connections axunta cada añu a más de 1.000 artistes nuna programación que s’estiende a lo llargo de cientos d’actividaes y qu’atrái de forma sostenida a más de 100.000 espectadores.
Amás d’esta convocatoria, la Conseyería de Cultura abrió la selmana pasada otra pa poder participar nel BIME 2026, l’alcuentru más importante de la industria musical que se celebra nel Estáu español y qu’anguaño va facese en Bilbao ente’l 27 y el 30 d’ochobre. Con esta iniciativa, la organización va escoyer una propuesta musical asturiana para ufrir una actuación curtia (showcase) énte profesionales de la industria musical, dientro de la programación de BIME Live.
El plazu d’inscripción remata’l miércoles 12 d’agostu y les bases y el formulariu pa presentar les candidatures tán disponibles na páxina web del eventu. Esta participación inclúi la producción técnica del showcase, les acreditaciones p’asistir a toles actividaes d’esti congresu y una ayuda pa contribuyir a los gastos derivaos de la participación del proyectu nel alcuentru.
Dambes acciones formen parte de la estratexa de la Conseyería de Cultura, Política Llingüística y Deporte pa favorecer la profesionalización y la promoción esterior de la música asturiana, facilitar la presencia d’artistes y bandes de la comunidá n’alcuentros especializaos y xenerar oportunidaes nueves pal sector musical asturianu.
Suscríbite a les nuestres novedaes
