El sábadu 8 de febreru en Lata de Zinc (Uviéu) va celebrase’l III Semando Fest, festival de música moza n’asturianu qu’entamen Musicasturiana.com y Ixuxú Cultura. Nél van participar cuatro proyectos d’estremaos estilos musicales cola característica común de que la mayoría de los sos componentes son menores de 35 años. La primer confirmación foi la d‘Abéu, que van ufrir un conciertu folk protagonizáu pol papel de la percusión, los cantares tradicionales y el baille. Con elles entamamos una serie d’entrevistes dedicaes a afondar nes propuestes que van sonar nesta edición del Semando Fest con reflexones, amás, sobre la situación de la música moza del país anguaño.
Lleváis cuasique tola vida na música tradicional, pero ¿qué vos llevó a entamar la vuestra propia propuesta?
Entamamos Abeú inspiraos por una montonera de grupos y músicos que siguen siendo pa nós unos grandísimos referentes anguaño, tales como L-R o Xabier Díaz y las Adufeiras de Salitre, por nomar dalgún. Queríamos buscar el nuesu soníu y aportar el nuesu granín d’arena a la música asturiana, y nello siguimos.
«Entamamos Abeú inspiraos por una montonera de grupos y músicos que siguen siendo pa nós unos referentes. Queríamos buscar el nuesu soníu y aportar el nuesu granín d’arena»
Sois un grupu de pandereteres al qu’amestastis acompañamientu instrumental y vos caracterizáis por caltener los ritmos pal baille, ¿cuál ye l’elementu más característicu de lo que facéis? ¿Qué importancia tien pa vosotres que la vuestra música tea lligada al baille tradicional?
Préstanos munchísimo más tocar cuando la xente ta armando filera. Toes vinimos d’un grupu de baille dende guah.es, onde la pandereta y el baille tradicional siempre foron de la mano. Ye importante que se caltenga’l xeitu de baillar n’Asturies n’espacios como conciertos o Nueches en danza, que nun quede relegáu namás a un contestu d’escenariu. Cada vez hai más xente interesao en deprender a baillar ensin tar comprometío con nengún grupu. Amás, siempre moló más tocar pal baille.
Nun sacáis single dende 2021 pero siguistis tocando en dellos espacios, ¿por qué? ¿Tenéis pensao volver a asoleyar dalgo?
Dempués de sacar los dos singles que tenemos nel Spotify, entamamos a preparar un repertoriu nuevu que reflexara tolo que deprendiéramos dende qu’entamamos col grupu en 2018. La idega ye grabalu nun futuru, pero sí ye verdá que tamos falando d’un proyeutu un tantu ambiciosu qu’entá ta cocinándose, siguimos descartando munches coses, cambiando otres… Queremos tar al 100% conformes colo que saquemos. Esperamos nun tardar muncho más.
«Dempués de sacar los dos singles, entamamos a preparar un repertoriu nuevu. La idega ye grabalu nun futuru, esperamos nun tardar muncho más»
¿Cómo veis el relevu xeneracional na música asturiana?
Solemos ser positivos enforma con esti tema y creemos que tamos nun momentu bien bonu de la música asturiana pero que lo meyor ta por llegar. Barriendo pa casa, podemos dicir con arguyu que dende va unos años cada vez hai más xente mozo interesao na pandereta y el baille; les escueles tán viviendo una bona época y si siguimos asina, queremos pensar que dirá a más. Tamién siguen xurdiendo nueves propuestes como Páxaros 01 de Ferla Megía o Ser quien a cantar de Sofía Castañón, Daniela Cohen, Jimena Menéndez y Sara Friera que mos dan el puxu pa siguir lluchando por esto.
«Tamos nun momentu bonu, pero lo meyor ta por llegar. Cada vez hai más xente mozo interesao na pandereta y el baille, y siguen xurdiendo nueves propuestes que mos dan el puxu pa siguir lluchando por esto»
¿Qué dificultaes topastis como grupu mozu pa entamar y afitavos na escena?
La más significativa yera qu’echábemos en falta muncha xente nos nuesos conciertos. Siempre tuvimos mui bien arrodiaos y de públicu nun mos podemos quexar, pero yera mui raro atopar cares de xente conocío, a nun ser que compartiésemos escenariu con ellos, nun yera común qu’apaecieran. Col tiempu dímonos cuenta qu’esi problema nun yera únicamente nuesu.
¿Qué aporta la vuestra propuesta a la escena moza?
Abéu tien como oxetivu ufiertar un enfoque diferente a la música tradicional y al contestu musical actual. Pretendemos llevar esti xéneru a les xeneraciones d’anguaño dando-y un aire más modernu. Queremos aportar y sumar a la música asturiana.
«Una de les dificultaes que topamos pa entamar yera qu’echábemos en falta xente nos nuesos conciertos, cares de xente conocío. Col tiempu dímonos cuenta qu’esi problema nun yera únicamente nuesu»
¿Faen falta más proyectos de música moza n’Asturies? ¿Qué formatu-yos daríeis?
Fai falta que les nueves xeneraciones entamen nuevos proyeutos y qu’usen más l’asturianu nes sos propuestes. La clave ye apostar pol relevu xeneracional y por un futuru onde la música n’asturianu tea presente en xéneros mui distintos. Hai que confiar y valorar na riqueza d’esa variedá.
«Fai falta que les nueves xeneraciones entamen nuevos proyeutos y qu’usen más l’asturianu. La clave ye apostar pol relevu xeneracional y por un futuru onde la música n’asturianu tea presente en xéneros mui distintos»
¿Qué otros grupos mozos d’anguaño o d’antaño vos inspiraron?
Munchísimos. Podríamos señalar los discos de post-folk-asturianu de L-R y Tanxugueiras de Tanxugueiras -dambos de 2018- como dos de los nuesos grandes referentes, pero quedaríanos nel tinteru muncha xente como Tuenda, Herbamora, Algaire, Eva Tejedor y les Pandereteres… Hai muncha calidá n’Asturies.
N’Asturies, anque poca por dellos motivos y, ente ellos, la emigración, hai música moza, pero munches propuestes nun escueyen l’asturianu nes sos composiciones, ¿por qué pensáis que ye?
Bueno, anque temos viviendo un bon momentu, quédanos tovía munchu camín qu’andar. Tenemos tan asociaos dellos xéneros musicales al castellán, que consideramos que’l camín más cenciellu ye tirar per ehí. Por suerte, tán xurdiendo nuevos referentes que van ayudanos a romper con esos estereotipos y fomentar que se faiga más música n’asturianu.
«Tenemos tan asociaos dellos xéneros musicales al castellán, que consideramos que’l camín más cenciellu ye tirar per ehí. Por suerte, tán xurdiendo nuevos referentes que van ayudanos a romper con esos estereotipos»
Yá p’acabar, ¿qué podéis avanzanos del vuestru conciertu nel Semando Fest?
Podemos adelantavos que, como siempre, va haber munchísimu baille y que pensamos dir con un repertoriu mui frescu. Queremos un conciertu mui participativu y pasalo lo meyor posible… ¡Tamos contando los díes!
Suscríbite a les nuestres novedaes
