Ye martes 11 de febreru a les 18.30h y aportamos a los Estudios 15:40 en Perdones, Gozón. Tenemos una cita con Entós, el nuevu grupu folk formáu por Celia Nieto, Javi Menéndez y Adrián Argüelles. Ye la primer vez que facemos esto: acompañar mientres un ratín a un grupu nel estudiu. Queremos conocer cómo ye’l procesu d’asoleyar un trabayu discográficu dende dientro y Senén Fernández ábrenos les puertes de so casa.
Entramos al estudiu y llegamos al control, onde tán trabayando Celia, Javi y Senén, acabantes de tomar decisiones sobre la que va ser la primer mezcla d’ún de los temes, esportando l’archivu pa entamar el mesmu procesu col siguiente. Foi n’ochobre de 2024 cuando los tres músicos decidieron contautar con Senén pa entrar al estudiu, qu’amás d’encargase de les xeres técniques, ye’l productor del trabayu. Dempués de delles sesiones intenses na cabina pa dexar rexistraes les pistes individuales, tán faciendo llabor d’equipu, apurriendo les sos anotaciones pa poder iguar detallinos y probar efectos. Asistimos a una «reunión de repunantes», el conceptu col que bromeen y que ye, a la fin, la esencia de la post-producción.
Aprovechamos pa charrar ente tema y tema. Cuéntennos qu’entamaron a xuntase pa tocar va dellos años, pero que les coses de la vida y un Erasmus ficieron que retrasaren el ponese a da-y forma al proyectu. La idea surdió de Javi y Adri; dambos lleven cuasi tola vida venceyaos a otres formaciones col so instrumentu tradicional, la gaita, y teníen ganes de folk. «Teníemos dalguna idea per ehí que díbemos tocando pero faltábanos daqué, nun sabíemos per ónde tirar. Inspirámonos un día, decidimos meter vigulín y Adri pensó en Celia. Faló con ella y equí tamos», confiesa Javi.
«Teníemos dalguna idea pero faltábanos daqué. Decidimos meter vigulín y Adri pensó en Celia»
Anque nun ye l’orde que vemos davezu nos entamos de les formaciones, entraron al estudiu de grabación con namás una actuación en directu a les espaldes como grupu. Tomaron la decisión, dicen, porque «nun ye lo mesmo date a conocer dándote cola paré qu’amosando un productu». Nesi camín, tuvieron tiempu abondo pa montar el repertoriu como queríen, dende buscar el so soníu a terminar tolos arreglos o pensar na estética de la puesta n’escena. Un procesu del que sacaron «pocos temes pero mui masticaos» que pagaba la pena aprovechar pa dexar grabaos y descubrir, dende fuera y colos conseyos de Senén, tolos retoques que pudieren necesitar.
Componiendo, arreglando y buscando un soníu propiu
El resultáu d’estes xornaes de grabación, producción y post-producción va ser un EP que mira al folk dende perspectives estremaes. Dalgunos temes van tener una sonoridá más cercana a grupos como Felpeyu o’l folk de cámara, pero tamién cuenten con arreglos y composiciones más cañeres o d’inspiración n’otres músiques del mundu ente lo tradi, lo folki, el canon folk y la so buelga propia. «Vamos facer un poco lo que nos da la gana, realmente», diz Javi ente rises.
La so idea orixinal yera un set de flauta, vigulín, bouzouki, mandolina y guitarra, pero «l’atmósfera creativa del procesu nel estudiu» fizo que cuntaren, tamién, cola collaboración de Dani Álvarez al bodhrán, pequeña percusión y la propuesta d’unes llinies de baxu «de lo más macarra» -en pallabres del grupu- qu’apurrió Senén.
Celia, Javi y Senén faen un trabayu cuasique d’orfebrería, poniendo l’enfotu en sacar un resultáu pulíu nes testures, precisión y espresión. Ente indicación y indicación surden conceptos como lo llixero, el frescor y hasta lo esotérico. Dambos músicos sírvense d’hasta onomatopeyes, tarareos y imáxenes gráfiques pa que Senén traduza too ello, al traviés de los mandos del control y colos recursos técnicos, nel soníu que busquen.
«’Barru’ ye’l tema más tradi. Montámoslu nun par d’ensayos nos que tábemos inspiraos. Ye un homenaxe a les estructures clásiques de Felpeyu»
Ún de los temes va ser ‘Barru‘, lo primero que sentimos en llegando al estudiu y nel que trabayen al rodiu de 45 minutos. Descríbenlu como’l tema más folki del so repertoriu, un homenaxe a les estructures clásiques de Felpeyu qu’entama con un xuegu ente la flauta, el vigulín y les cuerdes; sigui con una composición de Javi, ‘Cachos’; y fina cola so interpretación de ‘Nun hai carretera sin barru’. «Montámoslo nun par d’ensayos nos que tábemos inspiraos. Salieron un par de modulaciones y quedamos contentos con ello», desplica Celia.
Autoxestionando’l proyectu
Sobre’l procesu de pre-producción, comenten qu’aprovecharon la so esperiencia y el so rodaxe na música tradicional pa «intentar planificar les coses y organizales con tiempu, poniendo-y al proyectu tol ciñu que creemos que merez, ensin prises y dende’l nuestru soníu». Nesi sen, confiesen que van, pasu ente pasu, cuidando tolos detalles, faciendo les coses artesanalmente y un exemplu d’ello ye’l logu. Amás, tuvieron la oportunidá de cuntar con otros profesionales del sector y facer una sesión de semeyes cola fotógrafa Lucía Garó.
«Quiximos intentar planificar les coses y organizales con tiempu, poniendo-y al proyectu tol ciñu que merez, ensin prises»
Cuando entrugamos sobre la so xestión, coméntennos que tán apostando pola autoxestión: «Trátase d’un proyectu autoxestionáu al 100%. Nun apostamos nin pol micromecenazgu nin otros métodos de financiación alternativos porque creemos que nesta etapa del grupu ye lo más coherente col públicu y con nós mesmos».
Anque nun pueden desvelar nada entá, tán zarrando feches de conciertos en festivales mesmo n’Asturies que n’otros territorios. Tendremos noticies ceo, pero, mientres, confiesen: «Tamos agradecidos a los festivales que tán depositando la confianza en nós». La so primer actuación foi n’ochobre en Palencia nun festival de cerveza en Cervera de Pisuerga. Dicen que foi estraño y prestoso al mesmu tiempu probar el repertoriu lloñe de casa, pero que sintieron una bona acoyida per parte del públicu.
Dexamos a Celia, Javi y Senén a les 19.37h sintiendo’l siguiente tema y faciendo apuntes cola repunancia de quien va mirar per primer vegada al públicu y la profesionalidá de llevar cuasique tola vida arrodiaos de música. Marchamos agradecíes colos Estudios 15:40 por abrinos les sos puertes pa conocer un poco más el so llabor, y con Entós, por dexanos averanos al so trabayu y sentir en primicia lo que tán preparando.
Suscríbite a les nuestres novedaes
