Vuelta a la persecución de la llibertá d’espresión dende un Ayuntamientu asturianu. Nesta ocasión fueron unes declaraciones de Rodrigo Cuevas crítiques col actual modelu de les fiestes de San Mateo d’Uviéu les que causaron malestar ente la corporación carbayona, siendo tanto la conceyala de festexos del PP, Covadonga Díaz, como la vocera de Vox, Sonsoles Peralta, quien cargaron contra l’axitador folclóricu por amosar les sos opiniones enriba d’un escenariu.
Too remóntase a un conciertu que dio Rodrigo Cuevas esti fin de selmana nel Auditori del Camp de Mart de Tarragona, amosó’l so sofitu a Barraques Tarragona, una iniciativa popular festiva amenazada pola propia corporación tarraconense que, llueu de 20 años, quier forzalos a camudar l’allugamientu de les sos barraques. Tres de dar voz a una integrante del colectivu, Cuevas interpeló directamente -falando amás daqué en catalán- a la conceyala de cultura de Tarragona, Sandra Ramos, que taba presente ente’l públicu, y punxo como exemplu San Mateo: “N’Uviéu fueron mui listillos, ficieron lo mesmo. Quitaron les fiestes populares, los chiringuitos populares de la ciudá y la fiesta fizo caput». Dixo’l músicu cuestionando tamién la privatización de les fiestes, les casetes «gastrohorterada» y denunciando que «la fiesta popular perdióse«. «Yo nun lo fadría», espetó Cuevas a la conceyala ente los aplausos del públicu.
La respuesta nun tardó n’aportar per parte del Ayuntamientu d’Uviéu. «Yo si dalgo nun me presta nun lo critico y lo que faigo ye nun dir. Entós nun me queda muy claro lo que va facer, porque paez que les fiestes d’Uviéu son tan males, la hostelería ye tan mala… el caput que dixo de que s’acabaron les fiestes n’Uviéu; tamos a espenses de que diga qué va facer», retrucó la conceyala de festexos carbayona nuna rueda prensa cuestionando asina la llibertá d’espresión de Rodrigo Cuevas y amosando una vegada más la intolerancia ente los artistes contrataos pa San Mateo que cuestionen el modelu festivu actual.
Esta tarde Rodrigo Cuevas asoleyó un videucomunicáu n’Instagram reivindicando’l so derechu a la llibertá d’espresión y sorrayando que quier tocar n’Uviéu, porque son les fiestes de la so ciudá. El conciertu de Rodrigo Cuevas n’Uviéu -el segundu n’Asturies dempués del estrenu n’Avilés- ta programáu pal 21 de setiembre. Según lo axendao, el recintu de La Ería va acoyer, dientro de la programación de les fiestes de San Mateo, l’espectáculu La Belleza del «ministru de verbenes» y la so banda. Les entraes tán a la venta online dende finales del mes de mayu.
Suscríbite a les nuestres novedaes
