Vou va ser el primer álbum de Vero Rubio y nél van dir de la mano música, palabra y imaxe. Como desplica la multiinstrumentista «cada pieza del proyectu, instrumental o vocal, tien un poema/lletra y un videu que la acompaña, como tres caminos que lleven al mesmu destín». El trabayu va editase en dos formatos, un CD y un llibru, que contienen caún unes característiques concretes. Pa sacar alantre esti ambiciosu proyectu l’artista canguesa pidi 3.000 euros nun crowdfunding en Verkami que remata’l 12 de febreru.
«Tien muitu mimu, tien muitu ciñu, tien muitas horas», diz Rubio sobre esti trabayu que «yá ta grabáu y premezcláu y del que queda l’últimu emburrión: masterización y copias». La multiinstrumentista busca «financiación pa asoleyalu cola meyor calidá posible» y pa ello pueden facese aportaciones al crowdfunding que van dende los 10 euros -inclúi descarga online y apaición nos creitos del llibru- a los 1.500 euros -un conciertu cola banda al completu-. Ente les distintes recompenses tán les partitures, el manuscritu, el llibru, el discu y actuaciones n’estremaos formatos.
La previsión ye que Vou s’edite n’abril nos sos dos formatos. Per un llau va ser un discu con 11 pieces y un llibretu con un fotograma de caún de los 11 videos, un enllaz pa la so reproducción y un poema/lletra. Pel otru, va ser un llibru onde se narra la historia de caún de los cantares, recuéyense les partitures y tamién hai fotogrames, poemes/lletra y enllaces pa reproducir la música y l’audiovisual. Na canal de YouTube de la artista hai yá dalgunos avances del trabayu: «cuatro cenciellos que van tar incluyíos nel discu, amás de los resúmenes de dos conciertos y pequeñes esplicaciones de les pieces».
Autoxestión y collaboraciones
«Esti proyectu vien de les mios paranoies, de los mios camientos y de la mio necesidá d’entender, desplicar y poner una banda sonora a cada pasu que doi na vida», desplica Vero Rubio sobre la filosofía de Vou. Nél tola música y lletres tán feches por ella sacantes una melodía de ‘Vou cantar’ -que vien d’una pieza tradicional gallega- y la lletra de ‘el día’ -basada nun poema de Miguel R. Monteavaro-. Tolo demás: igües, videos, producción, voz y demás instrumentación -pianu, distintos teclaos, armoniu, trompa, trompeta, fliscornu y bodhran- ye obra dafechu d’esta artista canguesa.
Sicasí, Rubio nun ta sola del too. L’álbum cunta con varies collaboraciones a la sección de cuerda; cola flauta de Pepín de Muñalén; coles voces y coros d’Anabel Santiago, Puri Penín y l’agrupación vocal femenina Siset; y coles percusiones de Javier Bergia. Los mandos técnicos d’Andy da Silva, la imaxe d’Arturo Santiago y les correcciones llingüístiques de Miguel R. Monteavaro, completen l’equipu que da forma a Vou.
Cola publicación d’esti trabayu Vero Rubio da un pasu más na so trayectoria tres d’algamar el XV Premiu Camaretá al Meyor Cantar con ‘Dixo miou padre‘, xirar per toa Asturies en 2024 y llanzar dellos singles. La so carrera desenvuélvese ente’l mundu de la música clásica, onde tuvo la oportunidá de tocar con orquestes como la Orquesta Sinfónica de Barcelona y Nacional de Catalunya (O.B.C.), y el del jazz. Anguaño, toca en dellos grupos de distintos estilos (folk, rock, improvisación llibre, jazz…): Orquesta Céltica Asturiana, Sonámbulos, Improviso… Amás compaxina esti llabor como instrumentista cola composición y producción de la so música de manera independiente, daqué de lo que va vese esta primavera el so resultáu en formatu físicu si algama’l crowdfunding.
Suscríbite a les nuestres novedaes
