Dos años dempués d’estrenase discográficamente, el grupu folk-pop-rock Vérsica va llanzar un trabayu discográficu nuevu, La neña que nun medraba, una propuesta que vuelve axuntar música y poesía al traviés d’un relatu conceptual. El discu va ver la lluz enantes qu’acabe l’añu y yá pue sentise en toles plataformes musicales y ver en YouTube’l videoclip del primer single: ‘Al aldu los iviernos’.
Esti cantar ta basáu nun poema de Lourdes Álvarez, una de les voces destacaes de la poesía asturiana de l’actualidá. La escritora algamó, ente otros reconocimientos, el Premiu Teodoro Cuesta de Poesía (1992 y 1994), el Premiu de la Crítica d’Asturies de poesía n’asturianu (2006 y 2019) y’l III Premiu Nacional de Lliteratura Asturiana, concedíu nel 2023 pola Academia de la Llingua Asturiana. Musicalmente caltién l’amiestu de folk y pop-rock que caracteriza a esti grupu que tien na so formación a destacaos músicos y vocalistes de la escena.
«El discu articúlase al rodiu una historia na que’l tiempu y la paciencia ocupen un llugar central, col texu como símbolu de resistencia y pertenencia», desplica esta banda en rellación al so próximu álbum, que vuelve a tener un filu conductor conceptual nel que «cada cantar aporta una pieza nueva a un relatu común, nel que lliteratura y música entamen diálogu pa construyir un universu propiu». Poemes de Lourdes Álvarez, Xuan Bello, Inaciu Galán, María José Fraga y Cristina Menéndez Martín, amás d’otros testos venceyaos al universu narrativu del proyectu, dan forma a los ocho cantares del discu, que tamién va asoleyase en CD.
Vérsica ye un proyectu musical qu’esplora les posibilidaes de la poesía en llingua asturiana al traviés de la música y de la creación d’universos narrativos. El so trabayu entemez lliteratura, composición y interpretación en propuestes que trescienden el formatu de cantar. Debutaron a finales de 2024 con un primer discu basáu nun cuentu infantil escrito pol so vigulineru y cofundador, Gonzalo Pumares que trescurre al traviés de diez cortes musicales y nel que caún d’esos diez cortes ye un poema que, de dalguna mena, esplica una parte de la historia del protagonista del cuentu. Col so próximu discu, La neña que nun medraba, van siguir afondando nuna propuesta na que la poesía asturiana torna en materia musical y narrativo.
Suscríbite a les nuestres novedaes
