La primavera aporta con una bayurosa programación de música en vivo y varios artistes de música n’asturianu yá tán anunciando les sos próximes feches de conciertos pa estos meses. Estos díes Vérsica, Bandina Los Muiles, María Trubia & Pau Santirso y Rollu Folk publicaron a traviés de les sos redes sociales los cartelos de les sos xires nesta temporada.
La banda folk-pop-rock Vérsica entama na Térmica Cultural de Ponferrada esti 4 d’abril la xira de 2026 que, pel momentu va llevalos a La Llechera de Cancienes, en Corvera (6 de mayu); al Auditoriu Teodoro Cuesta de Mieres del Camín (9 de mayu), al Teatru Toreno de Cangas del Narcea (21 de mayu), al CMI El Coto de Xixón (25 de xunu) y al Centru de Cultura Antiguu Institutu de Xixón (15 d’ochobre).
La Bandina Los Muiles va tar amenizando delles folixes esta primavera. Asina ye como esti cuartetu que cunta ente los sos componentes a Paul Balmori y Rigu Suárez de Corquiéu y Baxel va tar el 12 d’abril en La Flor de Pria, el 30 de mayu nel Vermú de Pitanza (Les Arriondes) y el 23 de xunu nel San Xuan de Ribeseya.
El dúu formáu polos veteranos músicos y bailladores tradicionales María Trubia y Pau Santirso tamién continúa una xira qu’esti 2026 yá los llevó a La Maléfica de Piloña y a Lata de Zinc. Les sos próximes actuaciones van ser en La Pola L.lena (12 d’abril), na Taberna Narciso de Teberga (24 mayu), en La Marquesina del Alba de Rusecu (31 de mayu), en Santo Adriano (7 xunu), nel Antiguu Institutu de Xixón (12 xunu) y en Fresneo (31 ochobre).
El quintetu de música tradicional Rollu Folk tien 13 feches per delantre d’equí a agostu, tanto n’Asturies como notros llugares de la península ibérica como L.laciana, Burgos o Palencia. Les sos próximes actuaciones equí son esti 3 d’abril na Sidrería Vientu del Norte de Llaviana, el 4 d’abril na Primer Sidre l’Añu de Xixón, el 1 de mayu en Ciares (Xixón), el 16 de mayu en Lluces, el 7 de xunu nel Xixón Folk, el 25 de xunetu en Fiestes de Ciares (Xixón) y el 15 d’agostu en Fiestes de Tueru (Oles).
Suscríbite a les nuestres novedaes
