Xaime Arias y Carlos Casado publiquen “La mio neña”

El pasáu xineru Xaime Arias asoleyó’l llibru 10 canciones asturianes pa gaita y pianu. una obra que sigue’l camín abiertu por grandes compositores -mayormente pianistes- qu’arreglaron pieces de la tradición vocal asturiana pa pianu o compunxeron otres orixinales dafechu. Pa presentar el llibru, el pianista mierense yá dio dellos conciertos acompañaos de Carlos Casado a la gaita. Agora, esti dúu da un pasu más presentando en plataformes musicales una grabación rellacionada con toa esta xera: “La mio neña“.

«Grabámoslu pa dar a conocer esti trabayu nes escueles de música tradicional y recordar a los gaiteros que pueden facer coses atractives con otros instrumentos, nesti casi, el pianu», comenta Arias sobre por qué entraron nos estudios 4 Notes pa grabar con Alejandro Lafuente “Lafu” esti tema. Amás, el duu presenta un videu y anuncia que van siguir sacando más pieces: «Tenemos l’envís de siguir con más videos que valgan pa divulgar los temes del llibru asina como facer un dúu de gaita y pianu como formatu de conciertu». D’esta manera, les próximes feches onde poder ver a Xaime Arias y Carlos Casado en directo van ser el 6 de marzu nel Conservatoriu Profesional Anselmo González del Valle d’Uviéu y el 10 de marzu nel Muséu del Pueblu d’Asturies, nun actu entamáu pol Conceyu de la Gaita.

10 canciones asturianes pa gaita y pianu. surde de la collaboración de va tiempu ente Xaime Arias y intérpretes como Liliana Castañón, Anabel Santiago, Rosario González, Sandra Álvarez o los hermanos Valle Roso, amás del grupu de trabayu Axuntábense, entamáu nel Conservatoriu Profesional de Música «Anselmo González del Valle» (Uviéu). Nesti volume recuéyense les partitures de siete cantares de los adscritos al estilu de lo que se conoz como tonada y d’otros tres del repertoriu tradicional, por exemplu los afamaos «A la mar vanse los ríos», «Baxaron cuatro ayeranos», «La mina y el mar» o «Si quieres que te cortexe».

Mercar trabayos de Xaime Arias

Dexa un comentariu

X