“Los Fayeos de Mayo” yá tien la so camiseta

Puru Remangu y Musicasturiana.com vuelven a facer trabayu conxuntu. Tres de collaborar nel proyectu “Pogu, Perréu y Pandereta” y en “Romería“, agora saquen per vez una camiseta compartida. La prenda ye un homenaxe a “Los Fayeos de Mayo”, cantar compuesto por Igor Medio presente nel discu Yá! de Felpeyu y que según l’Especial Selmana de les Lletres Asturianes 2018 de RPA, ye la meyor canción de la historia de la música n’asturianu.

«Sabemos qu’esta canción tien muncho pesu sentimental pa muncha xente. La señaldá qu’inunda dende les primeres notes, con esa lletra que ye pura poesía, sentir a Igor cantándola sobre la melodía tan prestosa, zarrar los güeyos y viaxar pelos paisaxes que narra y poder tresportate al to llugar, al to abellugu…», comenten dende la newsletter Puru Remangu pa desplicar por qué asoleyen esti productu enllenu de mensaxe y emotividá: «Pero esti tema nun fala namás sobre la señaldá, o la emigración o’l tar fuera casa… tamién ye un llamáu a escoyer la to forma de vida. “Onde soi quien quiero ser” ye un mantra que pa que reflexonemos sobre la nuestra posición nel mundu y pa que onde quiera que tes, seyas quien realmente quies ser. Ye puxu y autoestima pa garrar les riendes de la to propia vida».

La camiseta tamién tien daqué de personal, yá que Musicasturiana.com y Puru Remangu foron dos proyectos que nacieron en 2017 y 2018 cuando los sos responsables, Xicu Ariza y Enar Areces, taben emigraos llaboralmente en Madrid: «Pa nós, esti cantar ta mui vinculáu a la nuestra historia, al pasáu y al presente, a la manera que tenemos d’entender la vida, de vivir a la nuestra manera. Tuvimos 12 años fuera d’Asturies y sabemos lo muncho que manca la distancia y el tar fuera de casa durante munchu tiempu, por ello nun podemos dexar de identificanos y emocionanos con versos como estos».

Col consentimientu de Felpeyu

«Queremos da-yos les gracies a Felpeyu y especialmente a Sonia Tuya por danos el consentimientu pa usar la lletra y dexanos facer esta amiseta basada en “Los Fayeos de Mayo”. Ye un arguyu pa nós poder facer esti pequeñu homenaxe al mayor cantar de la música asturiana y facer alcordanza d’Igor Medio, ún de los meyores creadores culturales que dio esta tierra y que nos dexó prematuramente en 2006 nun accidente de tráficu ente conciertu y conciertu», despliquen Puru Remangu p’agradecer qu’esta camiseta tenga l’aprobación de la banda y de la madre d’Igor Medio.

«Naguamos por que munches otres andarines puedan ser lo quien quieren ser. Por que esti cantar siga siendo eternu y siga emocionándovos, y por que nun vos cueste la vida entere regresar a los vuestros fayeos de mayo», remata Puru Remangu nel so comunicáu. La camiseta yá se pue mercar na web de Puru Remangu, na oficina que comparten en Xixón los dos proyectos y na tienda d’Uviéu de la marca de ropa, na que tamién tán a la venta dalgunos discos de música’l país.

Dexa un comentariu

X