El pasáu abril los cines Embajadores Foncalada d’Uviéu acoyeron col aforu enllenu l’estrenu d’Y agora que lo baillen los rapacinos. Lo llixero n’Asturies, un documental de L’Andecha Folclor d’Uviéu realizáu por Cuatro Gotes Producciones. Esta obra avérase a la tradición del baille a lo llixero n’Asturies, amosando la so música, los sos pasos y el valor cultural que sigue vivo güei en día. Tres del éxitu de la so primer proyección, el grupu de baille tradicional anuncia que, pel momentu, va haber trés más en festivales: el 23 de xunu nel FolkAyer (onde tamién van dar un taller de baille); el 5 de xunetu nel Zarréu Fest y el 4 setiembre nel Festival Internacional de la Gaita de Villaviciosa.
Y agora que lo baillen los rapacinos. Lo llixero n’Asturies afonda nel conocimientu de los bailles a lo llixero n’Asturies, estudiando los nomes colos que se conocen nes distintes comarques, les formes de baillalos según la zona, la disposición de los bailladores y los sones utilizaos pa acompañalos.
El documental fai un percorríu visual y musical per esti xéneru tradicional, visitando escenarios representativos de les distintes zones d’Asturies onde inda se caltién viva esta manera de bailar. La producción entemez pieces instrumentales con otres interpretaes y baillaes por miembros de L’Andecha, amás d’archivos audiovisuales procedentes del trabayu de campu realizáu pol colectivu a lo llargo de los años.
Suscríbite a les nuestres novedaes
