Ayeri xueves 13 de xunu los XII Alcuentros de Músiques Asturianes qu’entama la Oficina de Normalización Llingüística de Xixón xunto col Taller de Músicos de Xixón acoyeron l’alderique El relevu xeneracional na música tradicional asturiana. Nél participaron la panderetera y cantante Celia Corrales (Xixón, 2002); el músicu y pedagogu Rodrigo Joglar (Cabranes, 1988); y l’etnomusicólogu y profesor de baille Santi Galguera (Llanes, 1996) y tuvo moderáu por Xicu Ariza (Xixón, 1989); responsable de Musicasturiana.com. L’eventu retresmitióse tamién en streaming y yá ta disponible en YouTube el videu completu de les cuasi dos hores de mesa redonda.
L’alderique entamó con unos datos oxetivos: n’Asturies hai 127.000 menores de 30 años menos que va 25 años y el 60% del públicu que consume música asturiana nes plataformes dixitales tien más de 35 años. A partir d’ehí, la mesa redonda foi abarcando cuatro bloques temáticos: análisis del grau de conocimientu de la música tradicional ente la mocedá; el relevu xeneracional enriba los escenarios; el relevu nel públicu; y propuestes p’afitar un bon futuru pa la música asturiana de raigañu.
Los participantes falaron col rigor de quien lleva dende la so mocedá tocando en grupos de música -Verdasca, Abéu, Draque, Los Indianos de la Maleta al Agua, La Banda Latira…- ; d’entamar y participar en distintes iniciatives que puxen pola música’l país -Llar, Xornaes del Vigulín, La X.O.T.A…-, del so venceyu a agrupaciones de música y baille tradicional -LaKadarma, Trebeyu, Grupu Etnográficu L’Oriente…-, y de la so esperiencia como docentes nesti ámbitu.
Dalgunes conclusiones
De les sos intervenciones rescamplaron la autocrítica pa colos complexos y falta d’apoyu mutuu dientro la escena; el reconocimientu del boom que se ta produciendo dientro del mundu venceyáu a la pandereta y al baille; el desconocimientu qu’hai de la música asturiana ente la sociedá y la fuerte competencia que tien con otres músiques nesti mundu globalizáu y dixital; la importancia del componente llúdicu frente al ciertos conservadurismos; o’l papel clave de la educación p’afitar el futuru d’esta escena.
Suscríbite a les nuestres novedaes
