Leticia Baselgas (Xixón, 1984) ye cantante, panderetera y artista visual. Ye doctora n’Arte na Universidá d’Uviéu y nos últimos años punxo en práctica la so tesis principal a traviés del conceptu post-folk-asturianu, que trabaya y esperimenta cola resignificación de la praxis na música tradicional asociada a la pandereta, al empar que propón modelos alternativos pa la so aparición y desarrollu nes esferes públiques. Tien participao n’otros proyectos de música independiente como Lorena Álvarez y su Banda Municipal, Pablo und Destruktion o Losone. Anguaño ye perconocida por ser la frontwoman de L-R y formar parte Calea y Breizh-Asturies Project. Tamién ta entamando’l so proyectu en solitario, col qu’esti vienres 21 va dar el so segundu conciertu dientro del festival VESU.
Con ella siguimos cola estaya «La Banda Sonora De…«, una serie d’entrevistes de personalidá acompañaes d’una playlist de Spotify na que cada persona entrevistada escueye los 20 cantares que más-y presten.
La verdá ye que cuéstame escoyer. Préstame muncho la música en toles sos variantes asina que depende de la temporada voi camudando d’estilos. Tengo claro qu’hai discos que pa mí son básicos como por exemplu el London Calling de The Clash. Tamién hai discos que dexo reposar dalgunos años y que llueu lléganme anovaos ya sublimes, como foi el casu del Grace de Jeff Buckley. Como parez que tengo que escoyer, voi quedame col Led Zeppelin II porque ye un referente con influencia total en mí.
Pues depende pero, si pudiera viaxar nel tiempu, hubierame prestáu ser cantante n’algún grupu punk-rock de finales de los sententa ya conocer la experiencia del CBGB en Nueva York. A nivel estéticu prestame muncho la imaxen de Debbie Harry na primer época de Blondie; el rollu más conceptual de Patti Smith pero, sobre too, identifícome col compromisu total de Poison Ivy y Lux Interior col so proyectu únicu ya inconfundible: The Cramps. Si fuera nun grupu d’anguañu, prestaríame ser parte de la banda de Amy Taylor y The Sniffers, téngolo clarísimo.
Pues, otra vuelta, cuestame escoyer. Diría que Veis Volver porque fala de coses mui importantes pa mín y porque escribila dende una pulsión y un sentimientu mui potentes. Sicasí, tocar en direutu la Danza la xarra sigui faciendo que “me suba la bilirrubina” y, dalgunas veces, hasta lloro.
«La primer vez que subí con L-R a tocar sentime auténticamente llibre y eso ye lo que permanez. Colos años perdí esa sensación de “nervios na barriga” pero medró esponencialmente la lliberación, l’empoderamiento o la resistencia»
La primer vez foi con cuatru años pa baillar un xiringüelu vistida con un chandal color rosa. Foi dalgo qu’impactóme muncho y supe, yá d’aquella, qu’esi cóctel de serotonina y adrenalina del escenariu diba a proporcioname colocones mui lliberadores. Asína foi que la primer vez que subí con L-R a tocar sentime auténticamente llibre y eso ye lo que permanez. Colos años perdí esa sensación de “nervios na barriga” pero medró esponencialmente la lliberación, l’empoderamiento o la resistencia. Creo que soi feliz enriba l’escenariu.
Ye una entruga complicada, supongo que yá ye un clásico decir que “profesionalizase” y vete metida nuna industria que ye complexa. Ser muyer “cuarentona”, tocar nuna llingua minorizada o tar en grupos con una personalidá alloñada al standard del sector son cuestiones qu’a veces pésanme un poquitín. Sicasí, quiero dexar el drama fuera y apurrir lluz siguiendo la ideosincrasia del mio compañeru Rubén Bada: dexar de quexase, facer coses nueves y anovase día a día. Igual puedo dicir que lo inxusto ye nun tener más tiempu pa poder tocar más y/o nun poder bilocase y poder tar tocando con cuanta más xente meyor en distintos sitios del planeta al mesmu tiempu.
Nunca nun sedría Conseyera de Cultura, la verdá, pero abúltame que lo básico sedría dar sofitu a lxs artistes, a la nuesa llingua, tener empatía/conocencia del contestu ya facer y dexar facer. Ensin más.
«Ser muyer “cuarentona”, tocar nuna llingua minorizada o tar en grupos con una personalidá alloñada al standard del sector son cuestiones qu’a veces pésanme un poquitín»
Pues reconozo que, abrazando el pasáu, la primer muyer que vi empoderada nun escenariu foi la mio profe del grupu folclóricu, Pili. Marcóme y muncho. Pandereta en mano yera una frontwoman coyonuda. Dempués animáronme colectivos y persones coles que, dempués, tuve la suerte de collaborar como Muyeres o Eva Tejedor.
Julio Iglesias. L’añu pasáu lleí Hey! Julio Iglesias y la conquista de America de Hans Laguna y prestóme tantísimo qu’entamé a sentir les canciones de Julio dende otra perspectiva posible. Sí, a veces voi en coche, paro nun semáforu, baxo la ventanilla y suena Me olvidé de vivir. Lxs otros coches suelen flipar y muncho. Últimamente toi mui a tope con Sola d’Olé Olé pol capítulu al rodiu Marta Sánchez del podcast de Juan Sanguino Delirios de España, mui recomendable, jajaja.
Pues como dixe más arriba, si pudiera ser dalguien del pasáu sedría’l Little Richard de los cincuenta porque sedría pura fantasía tar con él nel escenariu y metese pal backstage a “falar de lo divino ya lo humano”. De xuru pasaría dalguna cosa lloquísima. Prestaríame tamién haber fecho dalgo asina con Sara Montiel o Massiel. Dando-y ales a la imaxinación, con Massiel faería a dúu Eres y na parte d’atrás del escenariu cantaríamos xuntas l’Asturias de Victor Manuel (jajaja) Too ello cola única razón de pasalo bien, claramente.
Pues la verdá ye que prestaríame muncho facer dalgo con La cama de Ana Vanessa Gutiérrez. Fae unos años fice unes illustraciones inspiradas nesti rellatu que ye ún de los mios llibros preferíos. La verdá, siempre alcontré nos llibros de Vanessa una poética cola qu’empatizo al 100% y, mira yá que lo dices, nun descartaría facer dalgo musical inspiránu na obra d’esta muyer ¿por qué non?
Suscríbite a les nuestres novedaes
