El quintu trabayu de la Fontoria yá ta na cai. Tres d’asoleyar el mes pasáu el cencielllu «Cuntando estrelles«, la banda piloñesa de folk progresivu llanza agora los siete temes que formen El neñu que cuntó toles estrelles. En pallabres de Maxi Areñes, cabezaleru de la formación, el discu «ta estráu de pingarates autobiográfiques que van dende los años de neñu y mozu, hasta güei» y nél suenen más de venti instrumentos estremaos.
«Ye un trabayu conceptual que fala d’un neñín que ta postráu nuna cama y que cunta estrelles dende’l ventanu del so cuartu pa distrayese. A midida que va medrando, el neñu tien la idega de que la xente, la sociedá, son xirasoles que, uniformaos, van toos al mesmu sen, adorando al sol y faciendo toos lo mesmo. Él nun quier ser como ellos, asina que decide qu’enxamás va ser un xirasol; sedrá un «Xiralluna«…», desplica Areñes pa falar del conceptu que ta detrás de los siete temes del álbum.
Como ye vezu nos sos trabayos, la banda piloñesa arródiase d’una montonera collaboraciones: Vero Rubio (trompeta y trompa), Josep-María Ribelles (Harpa), Mael Martínez (Bodhran), Olivier Grenoble (Flauta) y Maximín Martínez (Narración). Amás, Maxi Areñes encárgase de la voz, guitarres clásiques, acústiques y llétriques, baxos acústicu y llétricu, lap Steel, gaita rabil, xiblates, bombarda, pianu, harmoniu, electrorgan transpositor, órganos farfisa y lowrey, sintetizaores prop.
Más importancia del diseñu
«Nesta ocasión, l‘arte adquier un protagonismu munchu mayor que nos trabayos anteriores y va faciéndose ún colos temes del discu», comenta Maxi Areñes sobre un CD diseñáu por Maitetxu Isla. El neñu que cuntó toles estrelles grabóse na casa-estudiu de Maxi Areñes, en Piloña, ente abril de 2023 y marzu de 2024 y yá ta a la venta en musicasturiana.com o a traviés de les redes sociales de la banda por un preciu de 15 euros.
Suscríbite a les nuestres novedaes
