La nueche del 17 de mayu va quedar grabada na mente de toles persones que tuvieron presentes n’El Frontón de Grau. Dende pela tarde, la villa moscona yá tenía l’ambiente d’una cita especial, con dellos chigres enllenos a la espera de que, a les 22 hores, saliera al escenariu Tribute Against the Machine, el grupu tributu a Rage Agains the Machine que diba dar por empecipiada la última misiva, la postrer nueche na que Misiva diba percorrer con cantares tola so trayectoria. El tributu fizo alcordanza de los cantares más reconocibles de la banda californiana.
Colos asistentes yá enfotaos na música, lo meyor entá tenía qu’aportar. Pasaes les 23:30 hores, Misiva, el cuartetu formáu por Humber, Nostic, Óscar y David salieron al escenariu de Grau per vez última, a pocos metros del primer llocal d’ensayu que tuviera la banda. D’esa manera, entamó a sonar «L’árbol», unu de los cantares del últimu trabayu que sacaran pa, darréu poner les «Bombes» y dexar que’l públicu siguiera «La corriente» de los músicos que se taben despidiendo.
Namás con trés pieces, la nueche prometía. Y salía’l primer collaborador de la nueche, Tiby, de Flashback y Me Fritos and the Gimme Cheetos, col qu’echaron a correr, dando pasu tamién a «Héroes ensin nome» y al momentu nel que Falu daba entrada a los «Esclavos del momentu». Yera’l momentu de sacar a escena a más xente y lo fixeron Miki, ex de SHD, primer grupu d’Humber, y Jaime, batería de Los Ruidos, qu’acompañaron a la banda mientres un tiempu, con «Gran Mentira», del segundu LP de Misiva, siguida de «La casa’l mieu» y «Pexes inertes».
Nueve cantares y lo meyor entá nun llegara. Tres siguir faciendo vibrar a tol públicu con dos pieces más y siguir col repás a tola so trayectoria, llegó’l momentu del cantar homónimu de la banda, que diba enllazar con otres collaboraciones, la del gaiteru Blin (baxista de The New Ones) per un llau con dellos componentes de Sambre pa tocar una versión de «Atravesáu pelos chigres» y, d’otra banda, la de Mala Reputación, con Kiko, que fixeron españar les «Muries de soledá» y dieron pasu a «Semiente y bales» y «El dadu», dos cantares que fixeron esfrutar enforma y que son parte de la identidá del grupu moscón.
Cuando la nueche paecía que yá taba nel puntu cimeru, entá quedaben dos collaboraciones más. Y asina foi. El siguiente en xubir foi Patxi, de Los Bárcenas, pa dexar claro que, pa Misiva, el «Punk rock» ye la so vida. Y con ello, yera’l momentu de la última collaboración, una cola que la xente qu’enllenaba’l Frontón diolo too. Pablo y Pepo, de Desakato, cantaron «Invencibles», la pieza na que collaboraron nel discu homónimu del añu 2015. Tres d’ello, tocaba’l momentu de «Celebrar» y amagar cola despidida.
Pero Misiva nun se fixo de rogar muncho y siguieron En pie de xera, a lo menos, con trés cantares más. Con «Foriatu na mio ciudá» yera’l momentu de reivindicación llingüística y con esi cantar llegó’l momentu cimeru de la nueche con un públicu entregáu que llegó a xubise al escenariu y cantar colos propios músicos. Sicasí, too tien un fin y, tres venticuatro cantares y dos hores de conciertu, llegaba la fin del show y del grupu con «Rapaz refalfiáu», una adaptación de «21st Century (Digital Boy)», de Bad Religion.
Con ello, remataben quince años de punk-rock moscón y la trayectoria d’una banda qu’esfrutó del punk rock hasta l’últimu momentu. Pero esta misiva yá ye eterna y nun hai quien los apare. Humber, Nostic, Óscar y David son yá parte de la hestoria de la música n’asturianu y los que, mientres quince años, nos fixeron ser un poco menos foriatos na nuesa ciudá, los que fixeron españar les muries de soledá y facer una familia al rodiu de la so música. Esta misiva, la del 17 de mayu (y la de tolos conciertos que dieron) ye eterna.
Suscríbite a les nuestres novedaes
