Esta tarde ye l’últimu día que Rosa Rodríguez y Nacho Morán van baxar la persiana de Mundo Sonoro, histórica tienda de discos que lleva funcionando dende 1979. Ubicada na Plazuela San Miguel -primero na cai San Agustín col nome de Museo del Disco-, esti comerciu lleva 46 años n’activo, lo que fai que seya la tienda de discos más vieya d’Asturies. La música n’asturianu tuvo bien presente nel so escaparate nesti tiempu y amás, hubo un tiempu nel qu’esti negociu funcionó tamién como discográfica baxo’l nome Piraña Family Producciones.
Esti sellu -que tien esti nome a cuenta del nomatu de Nacho Morán, más conociu como Piraña-; editó a primeros de la década de los 2000 discos mui destacaos pa la música’l país como Al Son del Fueu de Xuacu Amieva, Latidos de la Tierra de Manolo Quirós, Jazz de Raíz d’Isaac Turienzo, Revolución Celta de los arxentinos Fardaxu, o’l 50 Aniversario de Los Xustos, ente munchos otros. Munchos d’ellos van poder siguir mercándose na tienda online de musicasturiana.com.
Col pieslle de Mundo Sonoro despídese de Xixón una tienda que-y dio identidá al comerciu llocal de la ciudá, que siempre visibilizó a la música n’asturianu y que dinamizó la escena a traviés de les milenta iniciatives desendolcaes pol matrimoniu formáu por Rosa Rodríguez y Nacho Morán, que van disfrutar dende mañana d’una merecida xubilación.
Suscríbite a les nuestres novedaes
