L’Asociación Cultural Entaína Ribeseya organiza un añu más la Folixa la Sidre apostando pola música’l país. Dende esti xueves 2 hasta’l domingu, Ribeseya acueye actuaciones de música tradicional, conciertos, concursos de gaita, de sidra casero y escanciao, y otres actividaes venceyaes a la cultura de raigañu. Los Muiles, Banda Gaites Ribeseya, Los Berrones, Arella, Banda Gaites Candás, G.E L’Oriente, Algaire, Muyeres, Ferla Megía y La Xarangana van poner son n’asturianu a la edición d’esti añu.
L’eventu arranca esti xueves 2 a les 20h con Los Muiles faciendo la ronda peles sidreríes patrocinadores del eventu. El vienres 3 a les 20h la Banda Gaites Ribeseya va facer el pasucáis hasta la carpa del eventu -asitiada na Campu Les Rolles- y, a les 21h, va haber conciertos cola mítica banda d’agro rock Los Berrones, el grupu de Cangues d’Onís Avalle Van y l’andaluz Paco Pecado.
El sábadu 4 a les 11h ye’l V Concursu Gelo Cuervo de gaita; a les 14.30h toca’l tríu de música tradicional encabezáu por Marta Elola, Arella; a les 18h hai un pasucáis de la Banda Gaites Candás y el Grupu Etnográficu L’Oriente y a les 21.30h son los conciertos. Van tocar el grupu de música tradicional renovada Algaire, la mítica agrupación de música tradicional Muyeres y Ferla Megía col so amiestu de música urbana, folk y canción d’autor.
La programación musical zárrase’l domingu 5 a les 12.30h cola Orquestina La Xarangana, que va poner la música a la preba popular de la final del IX Concursu de Sidre Caseru de Ribeseya. Amás de música, nesti eventu imprescindible pa la cultura tradicional y popular d’Asturies, va haber más actividaes venceyaes cola identidá del país.
Suscríbite a les nuestres novedaes
