12 conciertos de música n’asturianu pa festexar el Día d’Asturies

Güei ye’l Día d’Asturies y la música n’asturianu va garrar muncho protagonismu güei y mañana, amosando asina lo qu’Asturies tien de ser; un país arguyosu de los sos sones, de les y los sos creadores y con un públicu que quier disfrutar viviendo la música fecha na llingua autóctona del país. Esti añu, coincidiendo con esti día y con otres festividaes llocales, completóse una axenda qu’axunta un total de 12 conciertos d’estilos estremaos espardíos per tola zona central asturiana.

Los conciertos entamen dende bien ceo nos actos de los partíos políticos Aína y Somos Carreño/Grupu de Podemos Asturies na Xunta Xeneral. La formación asturianista d’izquierda programa una actuación musical de Nacho Vegas en La Casona la Montaña d’Uviéu pal mediudía, mentes qu’un sector de Podemos Asturies entama un actu en Candás nel que va tocar L’Andecha Turcipié dende les doce la mañana y 6 Riales a les 17.15h.

Llaviana concentra esti añu los actos institucionales pol 8 setiembre y nellos van actuar güei Cantares de… y pa nen@s a les 19h nos Xardinos del Palacio Valdés (Entrigalgo) y Dixebra a les 22h na Plaza’l Conceyu, Mañana ye’l turnu de José Manuel Tejedor y Hevia nesta mesma plaza de La Pola dende les 20h. Yá pal sábadu hai dellos conciertos programaos: Llan de Cubel a les 20h nel Teatru Clarín de Sotu’l Barcu, La Tarrancha nes fiestes d’El Portal de Villaviciosa a les 22h, Los Berrones a les 23h nes fiestes de Miravalles (Ayer) y Diañu Blues na Taberna Narciso de Teberga.

Pa rematar Mala Reputación da’l conciertu XXV aniversariu na Plaza’l Conceyu de Cangues d’Onís, nel que de xuru van tocar dalgunos de los temes n’asturianu que tien esta formación de rock estatal. Toos estos eventos marquen la continuación d’un mes de setiembre nel que va haber festivales mui destacaos como les III Xornaes del Vigulín, Trasiegu Fest o’l Cachu Fest y nel que yá se celebró tamién el ciclu Cultura Peatonal de Xixón o’l XVI Festival Internacional de la Gaita de Villaviciosa. La música n’asturianu, muévese.

Mercar discos de los grupos qu’actúen