Editorial: «Retu cultural»
Güei la Xunta Xeneral acueye’l primer plenu de la llexislatura 2023-2027. Nél falaráse d’economía, d’infraestructures, del retu demográficu… y yera bona cosa que se falara tamién del retu cultural, una de les grandes asignatures pendientes d’Asturies en más de 40 años de réxime autonómicu.
Venimos d’un branu nel que los distintos partíos políticos xugaron distintes cartes cola cultura. Húbolos que plantegaron censures y vetos, otros qu’asumieron discursos que tuvieron refugando dende’l poder per décades, otros que caltuvieron la so llinia… Al marxe d’estratexes partidistes, ye nesta llexislatura y nel momentu de desendocar politiques públiques onde se van ver los fechos qu’amusen la importancia que los partíos representaos nel parlamentu y nos ayuntamientos dan a la cultura.
«Venimos d’un branu nel que los distintos partíos políticos xugaron distintes cartes cola cultura: censura, asumir discursos anteriormente refugaos o caltener la llinia»
Porque puxar pola cultura asturiana y pola so industria ye una necesidá pa contribuyir al desarrollu económicu, social y cultural d’Asturies. Afitar la profesionalización del sector ye ún de los retos que reconocen los propios responsables culturales y pa ello ye necesario trabayar en cuestiones como un plan estratéxicu pa la cultura asturiana, nel que se decida qué se quier facer, pa qué y cómo, p’asina afuxir de la improvisación; la creación d’audiencies, p’algamar que la sociedá asturiana conoza y quiera consumir cultura asturiana -equí tienen un papel cimeru la educación, los conciertos de les programaciones festives y los medios de comunicación-; o la estabilidá, planificación y menos burocracia nes subvenciones, pa evitar que los proyectos subvencionaos tengan que facese en tiempos récords o que queden miles d’euros presupuestaos ensin conceder.
«Trabayar nun plan estratéxicu pa la cultura; na creación d’audiencies; na estabilidá y planificación nes ayudes y cuntar con una Axencia Asturiana d’Industries Culturales que dirixa, coordine, innove, forme, esporte y fortaleza’l papel de la cultura y del so sector»
Esto son namás tres propuestes pa siguir dando pasos nuna política cultural na que ye necesaria tamién cuntar con una Axencia Asturiana d’Industries Culturales que dirixa, coordine, innove, forme, esporte y, en definitiva, fortaleza’l papel de la cultura y del so sector profesional dientro de la sociedá y de la economía asturiana.
«Pinta bien que l’Acción Cultural y la Normalización Llingüística vaigan de la mano y ha aprovechase toles sos posibilidaes»
Por supuesto, la llingua asturiana ha xugar un papel protagonista y tresversal nesti procesu y, nesti sen, pinta bien que l’Acción Cultural y la Normalización Llingüística vaigan de la mano nel organigrama de gobiernu. Naguamos por qu’esto sirva p’aprovechar toles posibilidaes que tienen les distintes manifestaciones culturales -ente elles, por supuesto, la música- y facer por que la llingua asturiana espoxigue en toes elles.
