Esti domingu 1 de xunu a les 11.30h el Teatru Auditoriu de La Pola va acoyer la primer semifinal del XIII Concursu de Canción Asturiana Conceyu de Siero, ún de los eventos institucionales más veteranos dedicaos a l’asturianada. D’ente 28 semifinalistes -ventiún homes y siete muyeres- diez persones van competir nesta fase d’un certame que va rematar el 29 de xunu y que puntúa pal II Premiu Obdulia Álvarez ‘La Busdonga’ d’Asturianada qu’entama’l gobiernu asturianu.
Na semifinal del domingu van participar José Manuel González Granda (Llangréu), Manuel López Menéndez (Cangas del Narcea), José Sánchez Sanchez (El Valle Baju de Peñamellera), Aquilino Fernández González (Llangréu), José García García (Cangas del Narcea), María Latores (Uviéu), César González Fernández (Somiedu), Cristina Sánchez Sanchez (El Valle Baju de Peñamellera) y Isaac Sierra Longo (Parres). Amás, na Lucía Fernández Florez (Xixón) participa pa Categoría Moza y tamién xunto a María Latores na de Canción Vaqueira Memorial Graciano Gutiérrez «Radio Pola».
Pa esta edición inscribiéronse 42 persones dividíes en 27 na categoría absoluta masculina, 8 na femenina y 7 na de mocedá. Hai siete premios nes categoríes absolutes y premios nes modalidaes de canción, ayerana, vaqueira (Memorial Graciano Gutiérrez “Radio Pola”) y canción dialogada (Memorial Agustín Argüelles y Diamantina Rodríguez). La categoría moza ye una amuesa -lleven tola xente participante’l mesmu troféu, diploma y regalos- pero puntuable pal II Premiu Obdulia Álvarez ‘La Busdonga’ d’Asturianada. El 13 de xunetu va ser la gala de premios.
Suscríbite a les nuestres novedaes
