El Parque Xovellanos (Mieres) acoyó’l 21 d’abril de 2024 l’estrenu del espectáculu sinfónicu 13 Reyes – Episodio I una obra que marcó l’entamu de la collaboración ente la Banda de Gaites La Laguna del Torollu (San Cloyo, Uviéu) y la Banda de Música Atenéu Musical de Mieres. Dende aquel primer alcuentru musical, l’espectáculu llogró una estraordinaria acoyida, con crítiques bien positives per parte de la prensa y el reconocimientu del públicu asistente.
Tres del so estrenu, 13 Reyes anició un percorríu per distintos escenarios de la xeografía asturiana, con actuaciones n’espacios tan emblemáticos como la Plaza Mayor de Nava, l’Auditoriu Príncipe Felipe (Uviéu) y el Xardín de los Reis Caudiellu (Uviéu). La so proyección trespasó llueu les fronteres d’Asturies cuando dambes agrupaciones llevaron la obra al prestixosu Festival Interceltique de Lorient, participando nel espectáculu Horizons Celtiques, celebráu en Le Stade ente’l 12 y el 15 d’agostu de 2024. Díes dempués, el 17 d’agostu, el públicu pudo descubrir la obra completa en La Place des Pays Celtes, consolidando asina la dimensión internacional d’esti proyectu musical.
El reconocimientu siguió medrando y, tres de recibir el Premiu Gaudiosa’l 5 de marzu de 2026, Yónatan y Iñaki Sánchez Santianes (compositor y director musical de13 Reyes, respectivamente) anunciaron la continuidá de la saga. Nacía asina 13 Reyes – Episodio II: El Camino Primitivo, una entrega nueva que recrea’l viaxe d’Alfonso II a lo llargo del Camín hasta la so llegada a Santiago de Compostela.
El pasáu 12 d’abril tuvo llugar el prestrenu d’esti segundu episodiu nel Auditoriu Teodoro Cuesta de Mieres, nun alcuentru qu’axuntó a familiares y amigos de les agrupaciones participantes. Enriba l’escenariu diéronse cita la Banda de Gaites La Laguna del Torollu, la Banda de Música Atenéu Musical de Mieres y la Coral Cantates, xunto a la soprano Inés Cortés y, nuevamente, baxo la dirección musical d’Iñaki Sánchez Santianes.
Agora, la obra sigue’l so camín con una nueva y ambiciosa puesta n’escena. La Delegación de Defensa n’Asturies y la Fundación Municipal de Cultural del Conceyu d’Uviéu entamen l’estrenu de 13 Reyes – Episodio II: El Camino Primitivo, que va tener llugar el 30 de mayu a les 19:00 hores nel Auditoriu Príncipe Felipe d’Uviéu. Too ello con entrada llibre hasta enllenar l’aforu y cola posibilidá de facer una aportación voluntaria en sofitu a l’Asociación Down d’Asturies.
Un añu dempués del so anterior pasu pol auditoriu uvieín, la Banda de Gaites La Laguna del Torollu y la Banda de Música Atenéu Musical de Mieres van tornar acompañaes por un ampliu elencu artísticu que va arriquecer la esperiencia escénica y musical. Xunto a elles van participar la Coral Cantares, la Capilla Polifónica Palacio de Meres, el Grupu Folclóricu Trebeyu y la soprano Inés Cortés. A esta propuesta súmase amás la Escuela Gaudiosa d’Esgrima Histórica, con una puesta n’escena nos Premios Gaudiosa del pasáu marzu que dexó fondamente sosprendíu al propiu Yónatan Sánchez Santianes. La narración del viaxe xacobéu va cuntar, al empar, cola voz de Celso Fernández, encargáu de guiar al públicu a lo llargo del Camín.
Durante la presentación del eventu na oficina de prensa del Conceyu d’Uviéu, Iñaki Sánchez Santianes adelantó delles claves de lo que’l públicu va atopar sobro l’escenariu: «Va haber xotes, pandereta, panderu, gaita, la banda sinfónica… creo que ye bien interesante esta segunda parte porque introducimos la parte vocal y coral. Vien una sopranu que traemos de Salamanca, Inés, que tamién apurre ese dulce soníu de la voz y que nos ayudar a metenos tovía más no que ye la música y na historia. Ye mui interesante saber que va haber 100 persones enriba l’escenariu, una masa coral, una banda de gaites, una banda sinfónica, un grupu de pandereteres, un grupu de panderos, una sopranu y dalguna sorpresa más».
Suscríbite a les nuestres novedaes
