Mieres acueye esti fin de selmana dos estrenos de creaciones culturales rellacionaes cola música’l país y mierense. El sábadu 11 a les 19.30h na Casa la Cultura ye la inauguración de la esposición 30 aniversariu de la Banda Gaites Villa Mieres. Nella van poder vese los traxes de la banda, tolos calendarios d’estos 30 años y una esbilla amplia de semeyes cola trayectoria de la formación; amás, va haber una actuación d’esta agrupación de música tradicional.
D’otra banda, nel Auditoriu Teodoro Cuesta estrénase’l domingu 12 a les 13h 13 Reyes – Episodio II: El origen del camino, un proyectu de la Banda Gaites La Laguna del Torollu y la Banda Sinfónica del Ateneo Musical de Mieres, con composición de Yónatan Sánchez Santianes, que cunta la historia de la monarquía asturiana.
L’Episodiu I estrenóse n’abril de 2024 en Mieres y aportó hasta escenarios tan destacaos como l’Auditoriu Príncipe Felipe d’Uviéu o’l Festival Interceltique de Lorient. Esta segunda parte cunta’l viaxe d’Alfonso II a lo llargo del camín de Santiagu hasta aportar a Compostela.
Suscríbite a les nuestres novedaes
