6 Riales, Guieldu y la Banda Gaites Magüeta son los artistes n’asturianu que llevaron AMAS

El pasáu vienres 23 el Teatru Filarmónica d’Uviéu acoyó la gala d’entrega de los Premios AMAS 2024. D’ente los diecinueve artistes rellacionaos cola música n’asturianu y/o de raigañu que taben nominaos, trés d’ellos son los qu’algamaron el gallardón: 6 Riales con Mejor Disco Folk por Sutripar, Guieldu con Mejor Canción Folk por “Perdayuri” y la Banda Gaites Magüeta -banda infantil de la BG Villa de Xixón- na estaya de gaita. Amás, Desakato -que tienen dellos temes n’asturianu- recibieron l’AMAS d’honor tres despedirse de los escenarios el pasáu payares de 2023.

Como cada añu, les estayes nes que más nominaciones hubo pa la música d’espresión asturiana son les venceyaes a la música folk. Nesti sen, esti añu taben nominaos a Mejor Disco Folk los grupos Tever con Suañu de gaita, Antón Menchaca con Los díes contaos, 6 Riales con Sutripar y La Bonturné con A Contraforga. Na estaya de Mejor Canción Folk los escoyíos pol xuráu foron Rodrigo Cuevas con “¿CÓMO YE?!”, Guieldu con “Perdayuri“, Pandereteros d’Anguaño con “Sociedá de Consumu” y Fontoria con “La Partida“. Na estaya de Gaita, taben les bandes de gaites de Magüeta (Xixón), Conceyu Llangréu, Villa y Condáu de Noreña y Ribeseya.

Na Mejor Canción Otras Escenas taba nomináu Haim Álvarez con “Esconsueñu” y en Mejor Disco Otras Escenas, Mapi Quintana con Música pa tornar páxaros. En cuantes a instrumentistes, tenía nominación Susana Gudin de Taranus na categoría de Voz; y María José Hevia (percusiones) n’Otros Instrumentos. Tamién taba Espantayu na estaya d’Artista Revelación, Algaire en Mejor Videoclip con “Coral y Maera” y Desakato na estaya de Directo.

Mercar discos d’artistes nominaos a los premios AMAS 2024

Dexa un comentariu

X