Del 4 al 13 d’agostu la llocalidá bretona de Lorient acueye la 52 edición del so festival intercélticu, el más prestixosu del mundu celta. Tres dedicar l’anterior edición a Asturies -na que participaron más de venti artistes asturianos-, esti añu Irlanda ye’l país que va tener el mayor protagonismu y van ser ocho los nomes asturianos presentes nel cartelu: Jose Manuel Tejedor, Algaire, La Banda Gaites Camín de Fierro, L-R, La Banda Latira!, Rubén Bada, la Banda Gaites Castrillon y el Grupu de Baille Tradicional Fitoria.
Como novedá nesta edición destaca que yá nun va haber carpes de los distintos países celtes, sinón qu’existe La Place Du Pays Celtes onde van tar representaos toles naciones de la mesma manera, con unos pabellones más pequeños que cunten con representación institucional y gastronómica. Ellí va haber un escenariu central únicu onde artistes de tolos países celtes van dar conciertos diarios dende les seis de la tarde hasta la medianueche. Ye nesi espaciu nel que van tocar la mayoría de los grupos asturianos.
La presencia d’artistes asturianos entama’l llunes 6 a les 18h cola actuación de la Banda Gaites Camín de Fierro pa representar el so espectáculu Rock&Fierro. Un total de 25 músicos -venti miembros de la banda gaites y los cinco que formen el grupu rock-, van participar na segunda visita qu’esta banda fai al festival, dempués d’actuar yá nel 2014. Algaire foi la formación ganadora l’añu pasáu del Trophée Loïc Raison y esti añu dan dos conciertos: el martes 8 a les 21.30h en Le Kleub y el 9 a les 20.30h na Place des Pays Celtes.
El veteranu gaiteru avilesín José Manuel Tejedor va facer triplete nel festival; da dos conciertos cola so banda pa presentar el so trabayu últimu Lluz -ún el llunes 8 a les 11.30h na Place des Pays Celtes y otru’l 9 a les 21.30h en Quai de la Bretagne– y va ser gaiteru nel espectáculu Celtic Odyssée #2. Rubén Bada tamién toca nesti show nel que participen un total de 17 pernomaos músicos de tolos países celtes. La puesta n’escena va ser el vienres 11 a les 21.30h nel Espace Jean-Pierre Pichard.
La Banda… Latira! y L-R zarren la programación d’artistes asturianos na 52 edición d’esti festival. La banda astur-bretona toca’l miércoles 10 a les 14h na Place des Pays Celtes y el dúu post-folk fáilo’l domingu 13 a les 11.30h nesi mesmu espaciu. Destaca tamién la participación de les agrupaciones folclóriques: la Banda Gaites de Castrillón y el Grupu de Baille Tradicional Fitoria van facer delles actuaciones, desfiles y talleres ente los díes 5 y 11 d’agostu
Suscríbite a les nuestres novedaes
