Esti sábadu 26 de payares l’IES de Llanera, en Posada, va acoyer la primer #SerondaMoza, una cita nueva entamada pola Dirección Xeneral de Política Llingüística y pol Ayuntamientu de Llanera que va ofrecer un programa d’actividaes gratuites empobinaes al públicu d’ente 16 y 35 años. Ente otres actividaes, la música va tener protagonismu nesti eventu con un taller de rap impartíu por Miguina Selektah, una jam session empobinada por Ún de Grao y un conciertu de Llevólu’l Sumiciu.
«Deprendi l’arte del rap, faciendo lletres cencielles y canta con unes llecciones básiques. Vas facer piecines musicales pa impresionar a les collacies y collacios coles tos dotes musicales», asina presenten nel programa’l taller Rap: ¡Qué cante la Rapacería! que va dar Miguina Selektah, responsable del programa radiofónicu de música xamaicana Ximiélgalo Radio Show. Pa participar nél, va haber dos sesiones: de 11h a 12.30h y de 12.45h a 14.15h.
Per otru llau, Ún de Grao va dirixir una jam session ente les 16 y les 18h. Nella va facese l’adaptación de dos temes tradicionales n’asturianu incorporando soníos actuales con instrumentos y soníos corporales, asina como les voces de les persones participantes. «¡Si toques dalgún instrumentu puedes trayelu y sumalu a esta sesión! Si nun sabes tocar nada, ¡súmate tamién! Esta actividá musical ta pensada sobre manera pa divertise», comenten dende la organización.
Actividaes gratuites
Per último, el dúu d’electrónica de raigañu Llevólu’l Sumiciu va zarrar la xornada con un conciertu de 20h a 21h. Amás de la música, va haber talleres deportivos, gastronómicos, de moda, de cosplay y un mercáu cultural y d’asociaciones. Too ello dende les 11h hasta les 21h, de baldre, y con inscripción previa pa quien quiera participar nos talleres.
*Na semeya, Llevólu’l Sumiciu.
Suscríbite a les nuestres novedaes
