Mapi Quintana estrena’l 3 d’avientu n’Asturies l’espectáculu “Música pa tornar páxaros”

La artista Mapi Quintana y el Director Xeneral de Política Llingüística, Antón García, anunciaron esta mañana en rueda de prensa que l’espectáculu Música pa tornar páxaros va estrenase n’Asturies el 3 d’avientu a les 20.30h nel Teatru de La Llaboral de Xixón. Esta obra foi la que’l gobiernu asturianu encargó-y a la música l.leniza pa representar na 51 edición del Festival Interceltique de Lorient, que tuvo dedicada a Asturies. Tres l’éxitu que tuvo en Bretaña, agora va pode esfrutase equí d’esti espectáculu qu’axunta música, audiovisual y que ye un homenaxe al desapacíu Elías García (Llan de Cubel, Tuenda, Felpeyu…) y a tola xente que finó nestos años d’andanciu.

«Foi un momentu espectacular de la música asturiana». Con estes pallabres Antón García resumió lo que supunxo la interpretación de Música pa tornar páxaros en Lorient y por eso destacó qu’agora’l públicu asturianu puea esfrutar d’él. El Director de Política Llingüística fizo tamién na so intervención alcordanza d’Elías García -y tamién del actor Silvino Torre-, un pegoyu de la cultura asturiana que finó al poco tiempu d’entamar la llexislatura y qu’agora, en pasando l’andanciu, el gobiernu d’Asturies quier homenaxear a traviés d’esti espectáculu.

Pela so parte, Mapi Quinta recordó’l procesu que llevó a la creación d’esta obra -y del que se pue saber más nesta entrevista publicada hai unos meses por MUSICASTURIANA.COM- y faló tamién «del duelgu» como tresfondu de la obra dende una visión que llama a l’alcordanza, al cariñu y a «invocar a toos estos páxaros qu’echaron a volar estos tres años últimos». Nomes tan importantes pa la cultura de raigañu como Maria Trabáu, Celestina Ca Sanchu o la propia de Quintana foron reivindicaos pola artista.

Musicalmente van sentise muñeires, xotes, pasudobles, valsiaos… melodíes asturianes de composición propia y tamién tadicionales, interpretaes a tres voces onde l’harmonía va llevar al públicu a dómines más modernes y estétiques, inspiraes principalmente na música impresionista y el jazz. Tamién va haber espaciu pa la improvisación, tanto solista como per parte d’esti grupu formáu por César Latorre (piano), Sonia Cartón (voz y teclaos), María Sanmiguel (voz y violín), Thomas Welvaadt (trompeta) y Juanjo Díaz (percusiones).

Futuru discu

Amás d’esti conciertu del 3 d’avientu Teatru de La Llaboral -del que yá se pueden reservar les entraes gratuites na web de La Llaboral, na recepción de La Llaboral, nel Centru d’Información Turística del Principáu d’Asturies n’Uviéu, nel Centru Niemeyer d’Avilés o nel teléfonu 952 076 262-, Mapi Quintana tamién comentó que la so intención ye grabar estes canciones pa que tola xente que nun pudo ver l’espectáculu en Lorient nin pueda velo en Xixón sienta polo menos cola versión d’estudiu de Música pa tornar páxaros.

Con esta obra, Mapi Quintana da un pasu más nuna carrera que yá tien más de 25 años de camín. Con estudios universitarios musicales cursaos nel Conservatoriu d’Ámsterdam, Quintana asoleyó en 2009 el so primer discu en solitariu, ‘El Sonar de les Semeyes’, que supunxo toa una novedá dientro del jazz y la música de raigañu. Amás d’ésti, tien otros ocho trabayos publicaos tanto participando xunto a formaciones como Blima, Aire o Eladio Díaz Folk Ensemble, como a dúu col yá fináu músicu folk Elías García (‘Severina’); y a tríu con Michael Lee Wolfe y Jacobo de Miguel (‘Xota pa Tres’). Anguaño toca col proyectu La Maramoniz.

Mercar discos de Mapi Quintana na tienda online

Dexa un comentariu

X