Na seronda d’esti añu va asoleyar el discu Semando Son. Compilatoriu de música moza n’asturianu. Trátase d’un CD editáu por musicasturiana.com que recueye 3 temes inéditos de caúna de les formaciones que tocaron nel Semando Fest. La selmana pasada pasaron pelos Tutu Estudios de Corvera Alicia Villanueva y Luis Álvarez Pola, Loína y Algaire; mentes que Llevólu’l Sumiciu unvió les pistes de los sos temes dende Barcelona -formación na que vive ún de los sos componentes-. D’esta manera, acabó la fase de grabación del discu y nel mes d’agostu Sergio Rodríguez va facer les mezcles y la masterización del álbum.
Nel Semando Son, compilatoriu de música moza n’asturianu axúntense distintos estilos -tonada, folk de cámara, música tradicional fusionada y electrónica de raigañu- pa reflexar la diversidá estilística de los sones del país. La característica en común ye que tolos componentes de los grupos tienen menos de 34 años. D’esta manera, la iniciativa trata de puxar pol relevu xeneracional na música asturiana y promocionar los nomes nuevos d’esta escena.
El discu destaca porque va ser el primer compilatoriu de música moza n’asturianu y porque recuerda aquellos CDs qu’editaba Discos L’Aguañaz nos años 90 baxo’l nome de Nuevu Folk Asturianu, Tamién porque va ser la primer vez qu’Alicia Villanueva, Luis Álvarez Pola y Loína pasen pel estudiu de grabación y porque inclúi tres temes inéditos de cada formación. L’album va asoleyar a lo llargo de la seronda d’esti añu tanto en formatu CD como en toles plataformes musicales.
Suscríbite a les nuestres novedaes
