El plenu del Ayuntamientu de Gijón/Xixón aprobó esta mañana prácticamente por unanimidá, colos votos favorables de PSOE, Foro Asturias, PP, IU-Convocatoria por Asturies y Podemos; la moción en defensa y promoción de la música y cultura n’asturianu en Gijón/Xixón, especialmente nos eventos festivos, educativos, deportivos y culturales.
Dende la iniciativa «Música n’asturianu SÍ» alégrense «de que la proyección artística y la promoción del asturianu seya una puntu d’alcuentru y consensu de la gran mayoría de la corporación municipal». «Esto ye’l reflexu d’una sociedá xixonesa y asturiana que ve con arguyu y normalidá la so llingua asturiana, frente aquellos qu’inventaron un conflictu y quieren dividir a la sociedá creando problemes onde nun los había», sorrayen los promotores de la iniciativa.
«L’aprobación de la moción, supón tamién que’l plenu del Ayuntamientu desautoriza les intenciones manifestaes n’entrevistes, mítines y declaraciones a medios polos nuevos responsables de festexos de Vox. Amás, consigue l’efectu contrariu a lo qu’ellos queríen, porque’l testu aprobáu implica un compromisu en programar en Xixón más actividaes de cultura n’asturianu», valoren dende «Música n’asturianu SÍ» a lo qu’añaden que «too esto pon de manifiestu que yá nun se pue faltar el respetu a la cultura y llingua asturiana ensin qu’haiga una respuesta y que yá valió de qu’a los asturianos y asturianes nos intenten facer de menos».
Dende «Música n’asturianu SÍ» a partir d’agora van ver de qué manera se sustancia’l testu d’esta moción, y aseguren que van facer un «siguimientu de la programación de festexos de la ciudá na que nun puede tener sitiu la censura, nin los complexos nin los prexuicios llingüísticos». A la par, dan «les más fonderes gracies a los 5 grupos municipales qu’aprobaron la moción» y piden a l’alcaldesa «que garantice qu’esto va ser asina».
Intervención nel plenu
Tamién tuvieron la oportunidá de defender esta proposición durante cuatro minutos nel plenu. Nél intervino Mapi Quintana, trabayadora musical l.leniza afincada en Xixón, que mesmamente ayeri pela mañana llegó de tocar en Bélxica con Rodrigo Cuevas -ún de los artistes a los que Vox citó pal so vetu “ideolóxicu”– y pela nueche xubió al escenariu de la Plaza Mayor como componente de Girls To The Front. A lo llargo la so intervención desmontó los argumentos contrarios a la llibertá d’espresión y a la llingua asturiana y destacó la importancia d’apoyar más la cultura asturiana pol valor social, cultural y económicu que xenera.
La intervención nel plenu pudo facese gracies a la implicación nel procesu de l’Asociación Grana n’Alcordanza de Yolanda Huergo, una de les entidaes qu’apoyó esta iniciativa xunto a la Caxa Músicxs, la Sociedad Cultural Gijonesa, l’Atenéu Obreru de Xixón, y la Sociedad Cultural Gesto. El debate y aprobación nel plenu llegó como colofón a les acciones desendolcaes tres d’asoleyar un manifiestu “Música n’asturianu SÍ” y algamar en 5 díes 4.200 firmes del sector cultural en defensa d’esti testu.
Los grupos municipales posicionáronse
Los seis partíos políticos representaos nel Ayuntamientu de Xixón tamién marcaron postures en rellación a la moción. Olaya Suárez de Podemos, ente otres coses, destacó l’éxitu de conciertos que se celebraron l’añu pasáu nes fiestes de Xixón como’l de Rodrigo Cuevas o Los Berrones, reivindicó la diversidá llingüística peninsular y fizo mención a unes frases del cantar «La Pongueta» de Felpeyu. Tamién Noelia Ordieres d’IU-Convocatoria por Asturies tuvo referencies a la música n’asturianu, concretamente a Corquiéu. Punxo d’exemplu la trescendencia que tuvo’l cantar «Ribeseyana» que llegó a versionar un grupu xaponés, amosando asina la «trescendencia» y «la guapura» del arte. Pela so parte, Ramón Tuero, de la FSA, criticó les «barbaridaes» de Vox y sorrayó que si esto llegaba al plenu yera pol conflictu xeneráu.
Jesús Martínez Salvador, de Foro Asturias, foi claro cuando escomenzó la so intervención recalcando que «nun se va vetar nengún artista, y muncho menos a nengún artista asturianu». Amás criticó tamién l’acción del anterior gobiernu municipal que canceló eventos nos qu’había abondo protagonismu de la música n’asturianu como l’Arcu Atlánticu, los conciertos nel Botánicu o Al Resve, del que nun hai programación pa esti añu. Dende’l PP Ángela Pumariega agradeció’l «tonu» y «les formes conciliadores» d’esta moción y la so defensa y aclaró que’l so partíu siempre va tar a favor «del patrimoniu cultural y llingüísticu asturianu», poniendo como exemplu l’aprobación de la Llei d’Usu y Promoción del Asturianu en 1998.
A la fin, Vox quedó solu votando en contra d’una moción que calificó de «ociosa» porque considera que «l’usu de la llingua ta normalizáu dafechu». Argumentó que «tol mundu pue opinar llibremente menos Vox; eso sí que ye censura»; escaeciendo asina la conceyala, diputada y vicepresidenta de Vox Asturias, Sara Álvarez Rouco, que nun ye lo mesmo una opinión individual que la d’una representante d’un gobiernu municipal que dirixe la Conceyalía de Festexos. Tamién volvió a incidir na cuestión de les «batalles ideolóxiques» y afirmó que los espectáculos de «temática asturiana» tarán presente en Xixón ensin «monopolizar» la programación y n’«igualdá de condiciones» colos d’otru tipu; daqué que nun se plantea na propia moción, que ye respetuosa con toles manifestaciones artístiques, independientemente de la llingua emplegada.
Suscríbite a les nuestres novedaes
