El Festival Intercéltico d’Occidente (FIDO) aporta a la ventiséis edición y va celebralo enllenando Tapia de cultura celta dende’l 3 al 7 d’agostu. Charres, talleres, esposición, mercáu y conciertos dan forma a una programación na que la música asturiana va sonar coles actuaciones de Rubén Bada & Pepín de Muñalén, Rubén Alba & Nel de Purnea, La Bonturné, la Banda Gaites Villa de Mieres y l’agrupación folclórica La Madreña de Llanera.
A les 19h del xueves 3 arrancar’l festival col llevantamientu de la bandera celta na Casa’l Conceyu de Tapia, que da pasu a la inauguración del mercáu celta y de la esposición dedicada al folclore de Tapia. Asitiada na Antigua Casa de Cultura, ésta va tar abierta tolos díes de 20.30 a 21.15 hores. Al día siguiente’l protagonismu de la música asturiana va ser a les 20.30h cola actuación de Rubén Bada & Pepín de Muñalén nel Auditoriu de Tapia y a les 23h col conciertu d’una Verbena Tradicional nel Puertu de Tapia. El vienres 4 aporten les agrupaciones Banda de Gaites Villa de Mieres y La Madreña de Llanera, que van facer dellos desfiles y actuaciones a lo llargo’l festival xunto a otres formaciones tradicionales gallegues, bretones y escoceses. A la nueche toquen na Playa del Murallón la BG Villa de Mieres y Rubén Alba & Nel de Purnea.
El sábadu 5 el protagonismu van tenelu delles actividaes a lo llargo del día -que van acuyá de la música asturiana- y la Gran Nueche Máxica va ser l’espectáculu que va representase nel escenariu asitiáu na Playa del Murallón, a les 23h. El tríu bal-folk La Bonturné toquen el domingu 6 a les 23h nel escenariu de la playa acompañaos de los escoceses Rura y el llunes 7 la baxada de la bandera celta supón el zarru d’esti eventu veteranu del calendariu asturianu.
Escuela Internacional de Música Folk
Dientro de la programación, tamién destaquen una serie d’alcuentros alrodiu la cultura celta. El vienres 4 va haber na Plaza del Ayuntamientu, a les 12h, un taller de baille asturianu y a les 20.30h nel auditoriu una conferencia entitulada El Pericote, Bien de Interés Cultural Inmaterial de la Humanidad; mientres que’l sábadu 5 a les 13.15h La Madreña imparte un taller de pandereta asturiana nel auditoriu. Pa zarrar les actividaes d’esta escuela, el domingu 6 hai a les 18.30h nel salón de plenos del Ayuntamientu hai una charra-taller sobre pandereta gallega y a les 19.30h Santi Caleya presenta’l so llibru L’Acompañamientu d’asturianada.
Suscríbite a les nuestres novedaes
