Naz Espantayu, grupu punk-folk que s’estrena col cantar «Habelas Hailas»

Va unos díes anuncióse per redes sociales el nacimientu d’una nueva formación de punk-folk n’asturianu col nome d’Espantayu. Con daqué de misteriu como telón de fondu -dende’l grupu entá nun quieren desvelar quién son los componentes, nin d’ónde son-, Espantayu asoleyó’l so primer cantar na nueche de Samaín. Trátase de «Habelas Hailas«, un lyric video que presenten como «el cantar más diferente de tol discu: ta cantáu n’asturianu eo-naviego y tien una instrumentación diferente, más acústicu. Pero fala de bruxes, y ye la escusa perfecta pa sacalo esti día».

«Espantayu ye un proyeutu que naz pa dar voz a un puñáu de cantares que tienen unos añinos, pero nunca acababen de topar el so llugar, a pesar de tar siempre metíos en varies bandes», comenta a MUSICASTURIANA.COM un componente anónimu d’esi grupu que musicalmente tien dos grandes llínes: «el punk folk celta (Dropkick Murphys, Real Mckenzies, Flogging Molly,…) y el punk folk estadounidense (357 String Band, Moonshine Wagon, Goodamn Gallows,…)». Too ello ensin dexar de llau a «la música asturiana: tanto la tradicional, como toles bandes punk actuales».

Les intenciones de la formación son asoleyar el so primer discu enantes qu’acabe l’añu. Un trabayu qu’entamó a cocinase «fai cosa de dos años» , que ye «autoproducíu dafechu» y qu’acabaron de grabar «a finales de 2022». Ta formáu por esti single acústicu y otros ocho cantares «nuna llínia más punk-folk». «A la batería, el baxu y la guitarra, añadimos-y instrumentos como’l banjo, la mandolina… pa da-y esa sonoridá más folk», esclarien dende’l grupu.

Directu acústicu

«Quedaríanos falar de quién somos. Como tovía nun diximos nada, yá hubo xente qu’escribió per instagram pa entrugar. Fízonos gracia, asina que pel momentu vamos siguir asina». Sicasí, Espantayu sí que falen de los sos planes más inmediatos: «agora tamos trabayando nun directín acústicu de 3 o 4 cantares y la idea ye que salga enantes del discu». ¿Quitarán esi día la mázcara? «Igual aprovechamos el directu pa descubrilo, o igual non…». Al marxe de la incógnita, la escena de rock n’asturianu medra con esti proyectu nuevu.