El Teatru de la Llaboral acueye esti domingu la gala final del XV Premiu Camaretá al Meyor Cantar

Marisa Valle Roso, José Manuel Tejedor, Alienda y Vero Rubio son los artistes nominaos que van actuar nesta gala con entrada llibre.

Esti domingu va conocese quién va ganar el XV Premiu Camaretá al Meyor Cantar d’ente los cuatro artistes nominaos: Marisa Valle Roso, José Manuel Tejedor, Alienda y Vero Rubio. El galardón promovíu pola Viceconseyería de Cultura, Política Llingüística y Deporte llega a la so fase final cola gala que se va celebrar nel Teatru de la Llaboral esti domingu 12 de payares, a les 19:00 hores, y con entrada llibre. Nel eventu tamién va actuar el grupu de música tradicional fusionada Algaire, ganador de la edición anterior d’esti premiu col tema «Coral y maera».

«Tonada«, de Marisa Valle Roso, con lletra de la mesma intérprete llangreana sobre una estrofa tradicional; «Zanca de cabra«, d’Alienda, con lletra de Roberto González-Quevedo sobre una estrofa tradicional; «Les tos nales«, de José Manuel Tejedor, con lletra de Gema Fernández; y «Dixo miou padre«, de Vero Rubio, con lletra de la mesma multiinstrumentista son los cuatro cantares nominaos.

Un xuráu formáu por especialistes en música y llingua asturiana va ser l’encargáu de decidir el cantar premiáu, que va algamar una recompensa económica de 6.000 euros -lo mesmo que los otros premios lliterarios convocaos pol gobiernu asturianu-, la realización d’un videoclip y la contratación d’actuaciones promocionales. Con esto, la Viceconseyería de Cultura busca «consolidar, prestixar y arriquecer la creación musical tanto n’asturianu como n’eonaviegu».

Entrada llibre

La entrada ye llibre hasta enllenar aforu, con retirada d’invitación na Recepción de la Llaboral, nel Centru d’Información Turística del Principáu d’Asturies (CITPA) n’Uviéu, nel Centru Niemeyer n’Avilés, nel teléfonu 952 076 262, en unientradas.es y na web de la Llaboral.

Sienti los cantares nominaos

Suscríbite a les nuestres novedaes

Llista d'espera Vamos informate cuando recibamos unidaes. Por favor déxanos embaxo una dirección válida de corréu electrónicu.