Si 2023 foi ún de los grandes años pa Rodrigo Cuevas, esti 2024 ta entamándolo con muncha fuercia tamién. Con namás unos díes de diferencia l’axitador folclóricu acaba d’amosar una vegada más que ye una persona mui almirada dientro y fuera d’Asturies y que llega a sectores sociales mui estremaos que van dende la cultura más popular hasta la llamada «alta cultura«. La so recién collaboración con Grupo Beatriz y ser escoyíu pola revista Rockdelux como meyor discu estatal de 2023, dan cuenta d’ello.
El 5 de xineru el día alborecía con un regalu anticipáu de les «Reines Magues Asturianes»: el cadereo remix de «¿CÓMO YE?!». El cantar del branu asturianu que Rodrigo Cuevas publicó en xunu de 2023 y qu’incluyó nel discu Manual de Romería, garra una sonoridá más llatina nesta nueva versión na que la reina de les orquestes asturianes, l’acordionista Beatriz, incorpora voz, acordión y soníu de fiesta prau al yá de por sí hit veraniegu de Cuevas. D’esta manera, la propuesta del axitador foclóricu améstase a la d’una de les figures más populares de la música fecha n’Asturies.
Y del prau y les caxes de sidra, a les delicatessen de la crítica especializada musical. La revista barcelonesa d’ámbitu estatal Rockdelux escoyía recientemente a Manual de Romería como Mejor Disco Nacional 2023. D’esta manera, Rodrigo Cuevas sigue arrasando con un trabayu del qu’agora mesmu tán vendíes toles unidaes de CDs y vinilos; qu’aportó al puestu 3 y el 9 nes llistes oficiales de ventes del Estáu español nes estayes de vinilos y álbumes respectivamente; qu’algamó’l Premio Nacional de la Músicas Actuales 2023 que concede’l Ministeriu de Cultura; y que nos años anteriores yá llevó tamién los reconocimientos Premiu Camaretá al Meyor Cantar en Llingua Asturiana (2020); al Mejor Artista Revelación y Mejor Álbum de Fusión y Músicas del Mundo nos Premios MIN de la Música Independiente (2020); premiu El Ojo Crítico de Radio Nacional d’España na categoría de Música Moderna (2021); y Premio Arcoiris del Ministeriu d’Igualdá (2022)
Más de venti feches confirmaes
Esti sábadu 13 Rodrigo Cuevas retoma en Madrid la xira La Romería tres del so espectacular conciertu en La Llaboral de Xixón pa rematar l’añu. País Vascu, Valencia, Murcia, Catalunya, Andalucía, Francia, Colombia o’l Festival Interceltique de Lorient son dalgunes de les venti próximes paraes d’esti artista y la so banda. N’Asturies la próxima oportunidá pa ver esti show ye los díes 7, 8 y 9 nel Centru Niemeyer d’Avilés, anque les 3.000 entraes s’escosaron en menos de 45 minutos.
Suscríbite a les nuestres novedaes
