Entama un fin de selmana con muncha actividá. Ente güei y el domingu va haber conciertos y dellos eventos en dieciséis conceyos del país: Carreño, Valdés, Uviéu, Ribeseya, Xixón, Cabranes, Nava, Ayer, Teberga, Gozón, Parres, El Franco, Avilés, Pravia, Corvera y Quirós. El XXVII Festival Intercélticu d’Avilés y Comarca fina esti domingu 28 dempués de nueve díes d’actividá y, esi mesmu día, Granda celebra la so XXV Nueche Celta. Tamién apaez un eventu nuevu esti sábadu 27, La Pontiga Fest, dende les 12h nel Muséu Etnográficu de Quirós, cola música de Llevólu’l Sumiciu, Pandereteros d’Anguañu, la DJ Killaphonia y Cadorna «Folk atlánticu». Amás, la gaita va ser la protagonista d’otres tres cites: el XXVII Festival de Bandes de Gaites Villa de Candás, la XXVII Festa da Gaita d’El Franco y LXXIII Festival Folclóricu de La Peruyal.
Los conciertos de güei, vienres 26, arranquen en L.luarca, col estrenu de Milfueyes -Sandra Álvarez y Noemí G.- a les 18h nel festival Contubernios Líricos. N’Uviéu toquen Algaire a les 20.30h énte la Casa Conceyu, na Plaza del Ayuntamientu; el dúu de folk Baxel actúen en Ribeseya a les 21h, nel Camping Los Sauces; y el grupu d’agro-rock Fesoria a les Ortigues va sonar en Santolaya de Cabranes a les 22.30h. El domingu 28, Fabes de Mayo presenta’l so caberu discu nel CSA L’Apiaderu de Nava y Los Gascones actúen en Morea d’Ayer a partir de les 18h.
Xixón acueye tres eventos esti fin de selmana. El 42 Concursu de Canción Asturiana d’El Comercio sigue cola fase clasificatoria de semifinales. Ente güei y mañana, a les 19h, 22 voces de tonada van pasar pel escenariu de la Plaza de la República del barriu d’El Coto. Amás, les Fiestes Populares de Ciares apuesten pol rock astur colos conciertos de Skontra y Dixebra, güei dende les 22h, y un vermú con Rollu Folk, mañana a les 14h. Delles integrantes del grupu van impartir tamién un taller de baille a les 16.30h. El domingu 28, el Grupo Folklórico Trebeyu, la Banda Gaites Conceyu de Xixón, David Varela, L-R y Felpeyu toquen na Nueche Celta de Granda, una tradición nes fiestes de la parroquia xixonesa que lleva celebrándose venticinco años.
El Festival Intercélticu d’Avilés y Comarca estiende les sos actividaes d’estos últimos díes a los conceyos de Pravia y Corvera, amás de la programación central peles cais de la villa y Les Meanes. Dende’l vienres al domingu destaquen el gran espectáculu Nueche Máxica «Lluna Celta» cola participación de les formaciones de los estremaos países celtes -güei a les 22.15h-, el conciertu de José Manuel Tejedor y convidaos a les 22.15h del sábadu, y los actos de pieslle del domingu a partir de les 19.30h cola actuación de l’agrupación llocal Esbardu.
Fin de selmana gaiteru
La gaita protagoniza parte de los eventos. Güei, la recién formada Banda de Gaites Cabu Peñes toca a les 20h na plaza de la Torre del Reló de Lluanco xunto a la Banda de Gaites Corvera d’Asturies. Tamién continúa tol fin de selmana el XXVII Festival de Bandes de Gaites Villa de Candás col desfile de la Nueche de Gaites -vienres 26 a la medianueche- y el propiu conciertu central del festival nel Parque de Les Conserveres -sábadu 27 a les 23h- y les cuatro bandines que toquen nes nueches del vienres y sábadu: Los Gascones, La Garrapiella -vienres-; Bandina La Llume y Orquestina La Xarangana -sábadu 27-. Esta Fiesta d’Interés Turísticu zárrase’l domingu 28 a les 13h cola novena edición del Concursu de Pareyes de gaita y tambor “Memorial Diego Alonso” na Plaza La Baragaña y, a les 20.30h, una Tarde de Baille cola música de Caparines, Escontra’l Raigañu y Pandereteros d’Anguañu.
Mañana, Valdepares, n’El Franco, acueye la XXVII Festa da Gaita cola so Xornada de Gaiteiros Tradicionales del Occidente d’Asturies y l’actuación de Rubén Alba a les 19h. La Banda Gaites Camín de Fierro toca’l domingu 28 en Teberga y por último, el sábadu y el domingu va desendolcase’l LXXIII Festival Folclóricu de La Peruyal nel contestu de les fiestes d’El Bollu de Les Arriondes (Parres). Nestos dos díes van poder sentise los sones de la Bandina Los Muiles, Xuacu Amieva y a les Gaites Conceyu Parres, Orquestina La Xarangana (sábadu 27) y Banda Gaites El Gumial, Banda Gaites Villa de Xixón, Banda Gaites Los Yerbatos de Bimenes, Banda Gaites Villaviciosa – El Gaitero y Grupu Folklóricu El Corriellu la Pandorga de Bimenes
MERCA DISCOS DE LOS ARTISTES QU’ACTÚEN ESTI FIN DE SELMANA
Suscríbite a les nuestres novedaes
