La Banda Sonora de Vero Rubio

Vero Rubio (Cangas del Narcea, 1981) ye multiinstrumentista, toca’l pianu, la trompeta, la trompa y el bodhram. La so carrera desenvuélvese ente’l mundu de la música clásica, onde tuvo la oportunidá de tocar con orquestes como la Orquesta Sinfónica de Barcelona y Nacional de Catalunya (O.B.C.), y el del jazz. Anguaño, toca en dellos grupos de distintos estilos (folk, rock, improvisación llibre, jazz…): Orquesta Céltica Asturiana, Sonámbulos, Improviso, Nacasa Trío… Amás, compaxina esti llabor como instrumentista cola composición y producción de la so música de manera independiente.

Con ella siguimos cola estaya «La Banda Sonora De…«, una serie d’entrevistes de personalidá acompañaes d’una playlist de Spotify na que cada persona entrevistada escueye los 20 cantares que más-y presten.

Sienti la playlist La Banda Sonora de Vero Rubio

Un discu qu’enxamás canses de sentir.

The Gloaming 1, una guapura y una confirmación de que’l mundu ye grande y entren munches coses dientro.

Si tuvieres que formar parte d’otru proyectu musical, ¿cuál sería?

¡Oi! ¡Tengo un espectru bien ampliu! Un proyeutu cuidáu, bona xente que quiera trabayar, pa tar a gustu, y malo será que nun salga daqué…

De los cantares que compusisti o interpretes, ¿cuál ye’l to preferíu?

«Vou caminando». Valieron p’ayudar tolos cantares cuando los fixi, pero a esti vuelvo a cutiu. Foi’l primeru que fixi sola, pero nun ye por esi ciñu, ye que me fai bien, fala d’emociones que me faen bien, llévame a sitios de paz…

«Lo más inxusto de ser artista ye tener que saber de too, de facturación, contratación, contabilidá, publicidá, de cómo presentar una subvención…»

¿Cuándo foi la primer vez que xubisti a un escenariu y que pasó enantes, durante y depués?

¡Madre, llovió! Pues andaría polos 7 añinos, con un tecladín de 4 octaves que ponía nes rodíes, sentadines les nenes y los nenos nes escaleres de la ilesia Cangas, escolinos toos de Merce Otero, y alcuérdome de qu’había un pianu de cola, un colín, y pensé: “yo quiero tocar esi”.

¿Qué ye lo más inxusto de ser artista?

Tener que saber de too, de facturación, contratación, contabilidá, publicidá, de cómo presentar una subvención… de too. Cuando yes pequeñu y lo faes tu too, dalgún llau pierde.

Si fueres Conseyera de Cultura, ¿qué son les primeres coses que fadríes?

Per un llau, tratar de conectar y rellacionar más y meyor tolos sectores de la cultura, dende los colexos, les escueles de música, cases de cultura, teatros, asociaciones, artistes… pa compartir recursos y aprovechar meyor los qu’hai. Pel otru, sofitar el procesu creativu, non yá la resultancia, qu’haya más ayudes y seya más cenciello llegar a elles.

«Si fuere Conseyera de Cultura conectaría más y meyor tolos sectores de la cultura pa compartir recursos y aprovechar meyor los qu’hai. Tamién sofitaría el procesu creativu con más ayudes»

Enantes de ser artista de la música asturiana, de xuru que sentisti o visti en directo a más compañeros y compañeres d’esta escena. ¿Quién te marcó y t’animó a xubir al barcu de facer música n’asturianu?

Pues naide en concreto, y en realidá, toos. Foi un conxuntu de circunstancies vitales, una cuestión de sinceridá y necesidá. Sinceridá, porque cuando quixi faer la mio propia música, dime cuenta de que los mios raigaños tán nesta llingua, coles sos inflexones y les sos melodíes internes… «Dixo miou padre» ye una colección de frases feches de la mio zona, yera imposible faelo n’otra llingua, por casu. Y pásame tamién una cosa a la hora de cantar, faíseme más natural n’asturianu, gústame como siento’l cuerpu, como cimblen el pechu, el llombu y la barriga. La necesidá vien de que llegó un momentu que si nun facía “las mías cousas al miou aire”, españaba… “ya áu l.legue, l.legóu”…

«Entamé a facer música n’asturianu por una cuestión de sinceridá y necesidá, porque cuando quixi faer la mio propia música, dime cuenta de que los mios raigaños tán nesta llingua, coles sos inflexones y les sos melodíes internes»

Yá conocemos les tos recomendaciones y influencies… agora toca que te confieses: ¿cuál ye esi cantar o esi grupu qu’escuches culposamente “na intimidá”?

Nirvana, Korn, Linkin Park… igual ye lo que más sorprende… pero tampoco…

¿A qué personaxe públicu convidaríes a un conciertu tuyu, a pasar llueu pel backstage y pa qué?

Pos imaxinando lo que presta una jam lloca dempués de tocar: Martin Hayes, Avishai Cohen, Arooj Aftab, Jean Michel Beillón, Hania Rani, María Arnal… hai munchos.

Yá qu’escoyisti la to “Banda Sonora Vital”, vamos rematar con una Banda Sonora Orixinal. ¿De qué llibru n’asturianu te prestaría qu’hubiere una película a la qu’amás pongas-y tú la BSO?

«El viaxe a la lluz» de Ruma Barbero, qu’amás de que me prestó muncho, ye una novela gráfica y yá tien medio fechu’l guion.

Asina fala Vero Rubio de los cantares qu’escoyó pa la so playlist

Last night. Arooj Aftab. Faime bien, esta muyer faime bien… llévame a sitios bonos. Fai música neo-sufí, que ye una forma cantar d’orixe árabe/hindú y nesti discu fixo daqué bien grande con tolo que tien dientro… fixo un llugar de paz pa tol que quiera entrar nél.

First Honeymoon. Lau. Son un grupu irlandés bien interesante, xuegan cola estructura, col desenvolvimientu de les melodíes… nesti tema fáenlo col ritmu. Les melodíes y los sos enllaces son daqué maxistral. 

The weight of things. The Gloaming. D’esti grupu podía ser cualesquier. L’usu del pianu y de los instrumentos melódicos cola voz… tien muncha maxa… y sinceridá y calma y autenticidá… 

Sampedraes. La Bedur. Foi una sorpresa bona pa min, gustáronme los xuegos coles melodíes, l’aire que tomen, les contramelodíes volando alredor, los baxos de la mano izquierda nel so puntu… ¡ganes de sentilos en directu!

Rambalín. Rodrigo Cuevas. Ye una guapura. Gústenme enforma les igües, pero sobremanera gústame cómo lo canta Rodrigo Cuevas, sele, ensin drama, ente murniu y allegre… como la vida…

La carta. Mapi Quintana. L’usu de l’armonía, les igües vocales, les pauses… l’alma que tien esta muyer y la música que fai… 

Andolina. Tuenda. Hai munches razones poles qu’escuchar Tuenda y saboreala, pero, amás, la llinia de traversu que fai Pepín de Muñalén nesti cantar ye una xoya.

Nun Vulveréi a Ser Xóven. Tania Pereira. Cuidadín cola voz d’esta moza, nun ye por ser ella de Xedré y yo de Noceda, en directu ponte la carne de pita. 

Virar as tellas. Caamaño & Ameixeiras. El violín ta guapu, la voz ta guapa, esa curdión ta viva… 

Alfre y Güelita. Mapi Quintana. Pues mesma cosa que dixi… bienveníos a la maxa de Mapi. 

Romance de la prisionera. Anabel Santiago. Préstame enforma esti cantar, y préstame enforma cuando lo cantamos xuntes a dos voces, esfrútolo de corazón… 

Canteros. Felpeyu. Asoleyaron esti discu cuando volví p’Asturies, nesi mediu tiempu, y pasaron munches coses na mio vida nesi añu. Esti cantar pa mi significa volver.

Flutopia. Flook. La primer vegada que sentí esti cantar foi nun bus camín Tinéu y Cangas, yo puse-y Prokofiev y él púsome Flook… y de magar, siguimos… ¡Y otru detalle! Por John Jou, el bodhramista d’esti grupu, toco el bodhran; deprendí por él viendo vídeos despacino, hasta merqué’l mesmu instrumentu, un grande. 

De Grau a Concarneau. N’Arba. Esta música ta mui viva, sal del estómagu y siéntese garrada na tierra. 

Angueira. Guieldu. Esti grupu ta faciendo coses interesantes, pa segui-yos con un güeyu, tengo muncha curiosidá de ver el so próximu pasu. 

La tribu de Dana. Manau. Si me topáis pela cai per Uviéu con unos cascos grandones y con cara de nun ver a naide… hai bastantes opciones de que tea sintiendo esto.

En to ventana. Llevólu’l Sumiciu. Llévente onde quieren, tienen un soníu envolvente que nun dexa pensar en namás que lo qu’ellos quieren… 

Divka Marusechka. DakhaBrakha. Esti grupu ucranianu fai too dende l’estómagu, con agalles… nótase.

Will soon be a woman. Ibrahim Maalouf. Esti músicu franco-libanés toca con una trompeta de 4 pistones -el cuartu, pal cuartu tonu-. La música d’esa parte del mundu tien daqué.

Eden. Hania Rani. Pa buscar la paz nesti mundu, aunque namás sea dientro d’una…