Güei cúmplense 90 años dende que l’exércitu desarmara les barricaes d’El Llano, Cimavilla y Cuatro Caminos, finando la Revolución d’Ochobre en Xixón. Coincidiendo con esta efeméride, la editorial Hoja de Lata entama una Velada Musical Revolucionaria a les 20h n’El Café Macondo. El músicu David Varela, la escritoria y historiadora Pilar Sánchez Vicente y l’ilustrador Ángel de la Calle van protagonizar esti actu al rodiu la reedición de la obra Asturias. Octubre 1934 de Paco Igancio Taibo II que ta acabante asoleyar la editorial. Les persones asistentes van poder participar tamién d’esti homenaxe lleendo una esbilla de fragmentos.
«Quería preparar dalgo mui aproximao a lo que facía en Fierro, Carbón y Metralla. Hai un testu de Lluvia d’Agostu -de Paco Álvarez- que falaba de les hores de la sobremesa nel bar La Tranquilidad, esi santuariu hosteleru del anarquismu barcelonés onde había un curdioneru con una cicatriz d’un balazu y una curdión que posiblemente-y salvara la vida», desplica David Varela, matizando que quier «tresformar musicalmente’l chigre del Macondo neso». El músicu xixonés va proponer na velada un repertoriu «fechu pal rojeríu» con cantares y temes perconocíos como’l «Grândola, Vila Morena» de la Revolución de los Claveles portuguesa, «La Estaca», «Las Barricadas» o el «Bella Ciao». Tamién va haber espaciu pal repertoriu asturianu con pieces como «La Bella Lola». Too ello dende les ocho la tarde con entrada llibre.
Suscríbite a les nuestres novedaes
