Dende 2012 la Rexón de Murcia cuenta con una institución pública responsable de desendolcar gran parte de les polítiques culturales d’esta comunidá autónoma. Trátase del Instituto de las Industrias Culturales y las Artes y Manuel Cebrián ye’l so responsable, col que tuvimos conversando hai un mes nel BIME Pro 2024. Con él continuamos esta serie d’entrevistes na que tamién falemos con Fernando Garayoa, de Navarra Music Commision, y con Arkaitz Villar de Musika Bulegoa.
L’Instituto de las Industrias Culturales y las Artes nació en 2012, ¿qué reflexón facéis dende’l gobiernu de Murcia pa ver la necesidá de crear un institutu d’estes característiques?
L’ICA creáse pola necesidá de tener una forma xurídica muncho más flexible, más cercana y cola posibilidá de dar rempuesta a un sector, el cultural nesti casu, onde tener un formatu de Dirección Xeneral ye muncho más difícil pola rixidez que tien, y un ente públicu d’ámbitu empresarial permítenos tener esa mayor flexibilidá, axilidá y, sobre too, cercanía a la ciudadanía. Tenemos que dar rempuesta a eventos permanentemente y, munches veces, cuasi inmediata. Entós, el modelu d’alministración ye muncho más lentu qu’un ente públicu empresarial. Esa ye la principal razón.
«Tenemos estudios d’un impactu del sector cultural d’al rodiu los 23 millones d’euros, en datos del añu pasáu»
¿Cuáles son les principales llinies de trabayu?
Les principales llinies de trabayu como Instituto de las Industrias Culturales ye cubrir lo sectores industriales de la rexón. El primeru ye’l sector de les artes escéniques, teatru y circu. El segundu sector principal ye’l de la música en vivo: festivales grandes, festivales, de base, festivales de desendolcu del talentu, programes específicos y aiciones pal desendolcu del talentu mozu. Tenemos la escena musical -pal nuestru tamañu de comunidá autónoma- más representativa del panorama nacional. Otru de los sectores más importantes ye’l audiovisual: producciones cinematográfiques, distribución cinematográfica, creaciones cinematográfiques, convocatories específiques d’ayudes a rodaxes internacionales a traviés de la Film Commission Región de Murcia.
«De martes a domingu y de forma ininterrumpida, ofrecemos, non namás dende lo público, sinón tamién dende lo privao, una ufierta que ta cubriendo tol territoriu rexonal»
Nel casu de la industria musical, ¿qué aporta a nivel económicu a Murcia?
Agora mesmo nun pueo concretate’l porcentaxe del PIB, pero sí tenemos estudios d’impactu del sector al rodiu los 23 o 24 millones d’euros, en datos del añu pasáu, porque tamos próximos a facer l’últimu estudiu.
Hai una inversión por parte de los promotores privaos y un reporte socioeconómicu perimportante: hoteles, hostelería, contratación d’empléu… Hai que tener en cuenta que’l formatu mediu o grande de festival tien una contratación media de 250-300 persones por festival. Repercútese, tamién, n’hostelería, producción, sector servicios en xeneral. Esos datos permiten de dalguna manera priorizar el sector de la música en vivo, porque, como decía, de martes a domingu y de forma ininterrumpida, ofrecemos, non namás dende lo público, sinón tamién dende lo privao, una ufierta que ta cubriendo tol territoriu rexonal.
Nesta edición del BIME participáis promocionando los festivales de Murica
El BIME permítenos delles coses dentro de la estratexa d’aición. La primer d’elles, tar presente como gobiernu, que ye importante. Nesta edición, nel BIME tamos representaos Valencia, Murcia, Navarra y Andalucía. Somos comunidaes punteres nel desendolcu de la escena nacional y de proyectos específicos que van nesa llinia.
Amás de la visibilidá nacional, tamién ye un recursu pa los nuestros propios promotores, managers y creadores pola posibilidá de desendolcar networking, reuniones, axendes de trabayu… que ye perimportante. La tercer vía, esencial, ye que, por primer vez tenemos artistes seleccionaos nel BIME. De 22 artistes que se presentaron, foron seleccionaos pal showcase de la nueche Maestro Espada y Joseluis.
Tamién sirve pa que promotores y festivales con presencia puedan conocer artistes que yá tienen una carrera media y otros que tán arrancando. Ye perimportante pa esos artistes que son Marca Región de Murcia y Marca Cultura Región de Murcia.
«Venir al BIME sirve pa que promotores y festivales con presencia puedan conocer artistes y festivales que son Marca Región de Murcia»
Como bien dixisti enantes, Murcia tien grandes nomes musicales a nivel estatal, ¿cómo contribúin les polítiques que desendolcáis en que puedan esistir anguaño bandes de la repercusión d’Arde Bogotá o Viva Suecia?
Nós desendolcamos, precisamente, unos proyeutos afitaos nel talentu. Ún d’ellos ye’l Big Up!, un BIME muncho más pequeño, pero non menos importante. Esa foi la plataforma que permitió qu’Arde Bogotá, Joseluis y otros grupos emerxentes tuviesen el so xermen. Porque’l Big Up! ye un espaciu de promoción del talentu mozu y de la cultura que ta faciendo que prescriptores, promotores y directores de festivales tean sollertes del so grupu o compañía. Sony Music y Warner ficharon a grupos murcianos que tán sonando en toles televisiones y toles radios del panorama nacional anguaño.
Pa finar, ¿con qué presupuestu cuenta l’ICA?
12 millones d’euros.
Suscríbite a les nuestres novedaes
