El Semando Fest sigue anunciando novedaes pa la so tercer edición. Tres de presentar la selmana pasada a Abéu, l’eventu entamáu por Musicasturiana.com y Ixuxú Cultura da un nuevu nome del so cartelu: Ferla Megía. D’esta manera va avanzándose la pluralidá d’estilos que van sonar na sala Lata de Zinc d’Uviéu el sábadu 8 de febreru; dende la música tradicional fecha pal baille hasta propuestes renovadores influyíes pol pop, la música urbana y la tradición.
L’artista mozu sierense Ferla Megía ye ún de los nomes más nuevos y orixinales de la música asturiana. Ta acabante d’asoleyar el so primer EP n’asturianu dafechu, Páxaros 01, nel que pueden sentise seis temes nos que fusiona estremaos xéneros y influyencies: dembow, hip hop, trap, folk tradicional, trip hop, ambient, electrónica... Tuvo nomináu apocayá al XVI Premiu Camaretá col tema ‘Medrana a Medrar’ y la so propuesta amuesa que la Xeneración Z aporta a la música’l país con una renovación sonora y estética.
La selmana que vien va anunciase un nome nuevu del III Semando Fest, iniciativa que nagua por puxar pol relevu xeneracional na música asturiana; por ufrir un festival con un formatu orixinal qu’entemeza aspectos d’una gala colos d’un conciertu al usu; que reivindica les sales de conciertos como un espaciu afayadizu pal exposigue de la música de raigañu; y qu’apuesta por da-y oportunidaes a les y los creadores xóvenes. Esti añu tola identidá visual ta fecha artista xixonesa Paula Suárez Surimi.
Suscríbite a les nuestres novedaes
