DRB ta acabante d’asoleyar el single ‘Abdel-Presi‘, un tema nel que la electrónica y les melodíes d’Oriente Medio s’entemecen cola voz d’El Presi y los soníos del bouzouki. Nél pueden sentise, amás, cantos gnawa del norte d’África al ritmu de los qraqeb. Tres d’esta pieza ta Carlos García, filósofu y músicu que per muncho tiempu tuvo xubiendo a los escenarios baxo’l nome de Dr. Balkan y qu’agora fáilo con DRB, un proyectu que, nes sos propies pallabres «nun ye namás una fusión d’estremaes tradiciones musicales; ye tamién una esploración de los propios raigaños culturales y un convite a reflexonar alrodiu la identidá, la pertenencia y la tresformación a traviés de la música».
Con esta filosofía, DRB tien publicaos yá cuatro temes. Dempués de ‘La Panadera’ -publicáu n’ochobre-, aporta esti ‘Abdel-Presi’. «Anque podría paecer una pieza de músiques del mundu, nun busca una fusión sinón un espaciu onde cada elementu caltiénse fiel a sí mesmu, pero abriéndose a la presencia del otru», desplica’l músicu matizando que «la música equí nun trata d’homoxenizar nin resolver les diferencies, sinón convivir con elles. Ye un diálogu, non una integración». Asina ye como nesti casu reflexona, tamién, sobre les identidaes: «cada soníu sigui’l so camín, pero al topase, muéstranos que les identidaes, mesmo que les cultures, nun son daqué fixo nin zarrao. Son procesos que surden nel alcuentru colo otro».
Suscríbite a les nuestres novedaes
