El Grupu de Baille Tradicional San Félix de Candás estrena un nuevu espectáculu esti sábadu 14 d’avientu a les 18h na Antigua Fábrica d’Ortiz col títulu Volviendo a L’aniciu. Trátase d’un homenaxe a Fini Suárez, directora del grupu dende 1995 hasta la so muerte, y al desapaecíu grupu L’Aniciu. Nél van ser protagonistes la voz y la pandereta, pero tamién van sonar la gaita, el tambor y la curdión. Otru elementu importante va ser la indumentaria tradicional asturiana.
San Félix nació va más de cuatro décades col envís de caltener y mantener vivos los bailles, dances, cantares y indumentaria del país. Son dellos los espectáculos que ficieron nestos años d’actividá: Palabres (2013), Alluende (2018) y Llamando a conceyu (2023). Con esti quieren facer un homenaxe a Fini Suárez y al grupu mierense L’Aniciu, yá desapaecíu, ún de los primeros d’investigación etnográfica n’Asturies, que participó nel colectivu Muyeres en delles grabaciones, nel Festival Intercélticu de Lorient, y recuperaron les mazcaraes d’iviernu y sones, bailles y cantares del centru y de la cuenca’l Caudal.
A lo llargo de 45 minutos van actuar col pretestu de volver a l’aniciu, lo que «aveza tar naquello que nun conocemos pero queremos conocer. Si nun lo llegáremos a conocer enxamás, acabaría por desapaecer y con ello una parte cimera de la nuestra cultura, de la nuestra esistencia», en pallabres del GBT San Félix. Entamen l’espectáculu porque «pa que nun desapaeciera, foi importante que nos años 80 naciera L’Aniciu. Pa que siga vivu, ye importante, anguaño, volver a l’aniciu».
Suscríbite a les nuestres novedaes
