La música asturiana lleva tiempu solidarizándose coles 6 de La Suiza en conciertos, redes sociales y participación en movilizaciones; y esti vienres 24 de febreru va dar un pasu más. A les 19h la Casa’l Chinu de Cimavilla (Xixón) va acoyer l’actu presentación de ‘Nun ye delitu’, un cantar nel que participen dellos artistes de la música’l país en sofitu a estes persones represaliaes por facer sindicalismu.
Nel actu va estrenase’l videoclip de ‘Nun ye delitu’, va haber una sesión musical acústica y van tar presentes dalgunos de los artistes que ponen la so voz y los sos instrumentos en defensa d’esta causa. Ente ellos, Skontra, que son quienes salieron yá nun videu difundíu per redes sociales p’anunciar la convocatoria. El cantar tamién va llanzase’l sábadu 25 en toles plataformes musicales.
El casu de les 6 de La Suiza ye ún de los más graves de persecución a l’acción sindical nos últimos años. Surde nel añu 2017 cuando una trabayadora de la pastelería La Suiza denunció acosu llaboral y sexual contra’l dueñu del negociu y, arriendes d’ello, prodúcense una serie de movilizaciones poles que fueron condenaes seis persones a tres años y mediu de cárcel y una multa de mas de 125.000 euros.
Suscríbite a les nuestres novedaes
