El Centro Asturiano de Madrid anunció recientemente los sos galardones de 2024 y, ente les distintes estayes premiaes, vuelve a haber espaciu pa la música y cultura tradicional. Nesta ocasión, los urogallos concedíos nes categoríes de «Tonada«, «Gaita» y «Baile» son p’Alicia Villanueva, Pablo Carrera y el grupu de baille Les Ayalgues d’Ayer. Les distinciones va entregase a lo llargo de 2025.
El Centro Asturiano de Madrid lleva gallardonando dende la década de los sesenta del pasáu sieglu a distintes persones venceyaes esta entidá y a dellos aspectos rellacionaos cola asturianidá. Foi en 2008 cuando entamó a premir dientro del apartáu urogallos más cuestiones venceyaes a estayes como l’artesanía, la gastronomía, la defensa de la llingua asturiana y la naturaleza, el deporte o los festexos. Nel apartáu musical distínguense persones o entidaes rellacionaes col baille, la tonada, la música coral y la gaita.
El pasáu 10 de xineru la Xunta Directiva d’esta asociación astur-madrilana anunció los premios p’Alicia Villanueva, Pablo Carrera y Les Ayalgues. Villanueva ye una de les voces más destacaes de l’asturianada nos últimos años. Entamó a cantar dende bien neña y yá tien ganao una montonera de concursos, amás grabó la so voz nel discu Semando Son -editáu por MUSICASTURIANA.COM- y collaboró con proyectos como El Velcro y Llevólu’l Sumiciu. Carrera ye gaiteru dende rapacín, director de la banda de gaites Gaiteros del Carbón y responsable d’A Mansalva, escuela de música asitiada en La Felguera amás de productora d’eventos, discográfica y axencia de management. Por último, Les Ayalgues d’Ayer ye un grupu de baille fundáu en Cabanaquinta en 2006 y que tien actuáu per dellos países d’Europa como Bélxica o Portugal.
Suscríbite a les nuestres novedaes
