Yá ta en toles plataformes musicales ‘Resollu‘, el primer adelantu del próximu discu de la Banda Gaites Llacín que lleva’l mesmu nome qu’esti single. Trátase d’un tema que, en pallabres del codirector de l’agrupación y compositor de la pieza, Vitor Carbajal, «amuesa un soníu con muncha fuercia, con una llinia d’arreglos mui al nuestru estilu nel qu’amestamos a la banda gaites l’agarre y la presión de los vientos metales, la batería y el baxu«. Nél andechen Dani Alvarez (fauta travesera), Luis Nicolás (guitarra), Sergio Rodríguez (baxu), Miguel Herrero (trompeta y trombones) y Israel Sánchez (batería).
‘Resollu’ ye ún de los doce temes que formen el tercer trabayu qu’esta formación llanisca va asoleyar el 27 de xunu, diciesiete años dempués de la so anterior referencia. El discu va publicase en CD, vinilu y plataformes dixitales y fórmenlu «53 minutos de soníu» nos que la banda trata por «poner un pie na tradición y otru na modernidá y nesta ocasión busca un soníu más potente de la banda, a la par qu’añade propuestes sonores nueves que ruempen con tolo anterior», como adelanta’l codirector.
Resollu garra’l so nome del fenómenu natural que se da ente la roca y la mar provocando «la espulsión del aire en galeríes, escapando al esterior chorros d’agua de gran presión; una similitú cola fuercia de les gaites, les percusiones y los vientos metales», desplica Carbajal al rodiu un discu nel que tuvieron trabayando «dos años y mediu» ente l’estudiu de la Escuela de Música Tradicional de Llanes y los Tutu Estudios de Corvera, onde cuntaron cola producción de Lisardo Prieto y Sergio Rodríguez, amás d’una montonera de collaboraciones destacaes de la escena folk.
La Banda Gaites Llacín torna con puxu y muncha gana de facer ruíu nes siguientes selmanes, asina que va haber más novedaes rellacionaes con esti tercer discu. Toes elles van camín de la que va ser la gran puesta n’escena del álbum: el conciertu del 4 de xunetu en Llanes nel que va poder vese a esta agrupación con varies collaboraciones, dando como resultáu un espectáculu únicu con más de trenta músicos y bailladores n’escena.
D’esta manera, l’agrupación sigue dando los pasos que definen a una banda creada en 1998 nel conceyu Llanes pente los escolinos de la Escuela de Música Tradicional. Nesti tiempu xiró per países como China o Estaos Xuníos; actuó nos principales festivales del xéneru y algamó reconocimientos y premios. El repertoriu qu’executa fai un viaxe pel patrimoniu musical asturianu dende los vieyos temes tradicionales a los más actuales, pasando per composiciones propies y, en delles ocasiones, fusiones musicales con pieces de los paises que formen l’Arcu Atlánticu. Nel so tercer discu, Resollu, van afondar nesti llabor qu’abrieron discográficamente con Tornallás (2002) y Xideces (2008).
Suscríbite a les nuestres novedaes
