El CachuFest’25 anuncia’l cartelu completu, los conciertos por díes y actividaes paraleles

En diez díes entama’l CachuFest’25, segunda edición d’esti festival que del 19 y 21 de setiembre va enllenar l’aldea de Trabáu (Degaña) de música, cultura y tradición. La organización del eventu yá anunció la distribución de conciertos por díes: el vienres 19 actúen les bandes asturianes Llevólu’l Sumiciu y Abéu -xunto a Dulzaro de Castiella, Alana de Galicia y DJ Bocamina– y el sábadu 20 la música asturiana de Guieldu y Picarós comparte cartelu colos madrilanos Cuélebre, los gallegos De Ninghures y DJ Killaphonía. Amás, yá se conocen delles actividaes paraleles.

Ente estes otres actividaes que van acullá de la música destaca l’homenaxe y inauguración de la escultura a Rosa Cunqueira (1971-2024). Esta figura fundamental nel caltenimientu de la cultura y la música tradicional nel suroccidente asturianu y impulsora de milenta iniciatives venceyaes a los sones y la identidá del país va ser reconocida con una estatua nel pueblu pol que tanto trabayó. A les 11 la mañana del domingu 21 na Guarida del Cunqueiru celébrase esti actu nel que van lleese dellos testos al cargu de familia y allegaos y llueu va haber un pasacáis hasta la carpa del CachuFest facer alcordanza del llegáu de Rosa.

Otres de les actividaes qu’acueye esta segunda edición del CachuFest van ser un mercáu y muestra en directo d’oficios tradicionales; xuegos tradicionales con 6 Conceyos; la esposición de ‘En el umbral del olvido’ d’Analía Pelledo; un monólogu de David Acera; y sesión de DJ con La Viuda de Angelín. Tola información al completo va asoleyándose nel Instagram del festival.

Entraes y acampada

Los abonos pal CachuFest’25 yá tán a la venta por un preciu estándar 44,90 € (hai otres tarifes rebaxaes pa residentes y menores) y l’eventu cunta con camping, baños, duches gratuites y zona d’aparcamientu pa campers y autocaravanes. La entrada ye de baldre pa menores de 12 años pa esti eventu entamáu por Espacio Tormaleo en collaboración con La Guarida del Cunqueiru y Il Truganal y l’apoyu de la Conseyería de Cultura, Política Llingüística y Deporte y la Comisión Europea.