Al fascio no se le amansa con músicas; para amansarlo hace falta un fusil… hay que prepararse para la caza.
Ramón González Peña (intervención nel Centro de Sociedades Obreras d’Uviéu, 4 de setiembre del 1934).
L’oxetu d’esti artículu son les canciones y los sones de la revolución asturiana del 1934; nél, voi centrame sobre manera nos que pudieron cantar y escuchar les fuerces revolucionaries naquellos quince díes d’ochobre, yá fuera en vanguardia, en retaguardia, pela radio o nos chigres. D’aende que queden fuera les canciones creaes a posteriori n’homenaxe y na acordanza del ochobre asturianu, n’especial tol repertoriu alredor de la figura mítica d’Aida Lafuente o les composiciones de les que s’ocupen trabayos como’l discu El son nos cantares de la revolución d’ochobre de 1934, la película documental Cantares d’una revolución o llibros como Cuaderno de la Revolución y La revolución escrita. Son esos cantares, los compuestos polos presos nes cárceles o por elementos de les organizaciones polítiques y sindicales, los que más atención recibieron de los historiadores, los musicólogos y hasta de los grupos musicales contemporáneos, lo que puede esplicase en della midida polos procesos d’intervención política, pola construcción de memoria militante o pola mitificación de los socedíos d’ochobre nel imaxinariu de los herederos de los mesmos. Sía que non, nun son l’oxetu central de les ringleres que vienen de siguío, que nun busquen facer un recuentu total de les referencies musicales d’esti periodu, sinón que busquen acercar -más qu’analizar- a los y les llectores otra manera de ver y d’escuchar la banda sonora de la revolución asturiana; como intentu modestu, a lo último, de reflexar que la historia social y cultural del ochobre asturianu tien qu’incluyir tamién les espresiones artístiques. Asina les coses, estes páxines tán conscientemente más cerca de la divulgación y del llamáu d’atención que d’una investigación historiográfica peracabada; a estes, nun tien que caer embaxo que, a pesar de lo que pudo lleese na prensa asturiana con motivu del 90 aniversariu de la revolución, queden tovía aspectos a esgaya por investigar: l’exiliu de los revolucionarios, la rede de solidaridá pa colos fíos y fíes de los presos, les foses comunes, la participación de les muyeres o les espresiones artístiques xeneraes pol ochobre asturianu. De cualquier de les maneres, acuto espaciu tamién nestes páxines p’aquelles canciones y músiques de les tropes gubernamentales y tamién apunto daqué de la tresmisión de les canciones tres de la revolución.
El 13 d’abril del 1931, tres de les elecciones, hubo una manifestación en Xixón que n’acabando dio pasu a un conciertu de la banda municipal na plaza del capitán Galán (actual plaza d’El Carme). La banda percorrió la ciudá pela nueche, interpretando, nunes hores d’exaltación republicana, La Marsellesa y l’Himno de Riego, dos temes bien presentes non solo n’actos republicanos, sinón tamién n’actos específicos del movimientu obreru (RADCLIFF 2004: 155). Sicasí, nes cróniques, reportaxes, memories y investigaciones de la revolución asturiana d’ochobre del 1934, trés años depués, malapenes hai referencia a estos temes musicales. Ello nun dizque seya cosa d’un abandonu consciente y definitivu d’estes pieces, y tampoco nun dizque que tuvieran desplazaes por otros himnos específicos del movimientu obreru como parte de la construcción d’una cultura proletaria, yá que sabemos que convivieron bien d’años. Na mio opinión, son únicamente los propios acontecimientos revolucionarios los que los desplacen al poner nel centru la revolución social y non la forma de gobiernu, d’aende que’l cantar omnipresente nos díes d’ochobre fuera La Internacional. En realidá nun foi un fenómenu nuevu, yá que podemos observalu col papel que tuvo la Comuna de París nel sieglu XIX y hasta la I Guerra Mundial (tovía nel 1915 aprendíen-yos canciones comuneres a los neños na escuela de la Casa del Pueblu de Turón: ÁLVAREZ 2004: 97), dalgo que foi amenorgando adulces mentanto aumentaba la importancia d’otros cantares y d’otros socedíos del movimientu obreru.
Los mineros d’El Fondón
todos gasten boína
con un lletreru que diz:
todo sale de la mina.
Nos años trenta, tamién nos quince díes de revolución d’ochobre y tamién tres del golpe d’estáu nel 1936, nos actos organizaos pol movimientu obreru podemos ver otra vuelta tendencias afitaes na tradición de la cultura popular militante como la qu’estudió’l profesor Jorge Uría na década anterior, onde’l tonu politizáu de los actos «se combinaba con espectáculos más digeribles que garantizaban el éxito y la necesaria conexión con el público popular» (RODRÍGUEZ VALDÉS 2004: 21). La historiadora Pamela Beth Radcliff decatóse de que, respecto de los espectáculos artísticos organizaos polos sindicatos, nengún d’ellos «estaba completo sin una fervorosa versión de “La Internacional”, las demás secciones musicales eran muy variadas, abarcando desde compositores clásicos hasta música popular asturiana», lo que na so opinión cuenta que se facía «porque conectaba el movimiento con una cultura popular tradicional, o porque creaba una atmósfera confortable y familiar para el aprendizaje de nuevos principios» (RADCLIFF 2004: 249).
D’otra banda, y masque tea poco estudiáu, esistió un repertoriu popular de cantares contra’l cleru y contra les fuerces militares con anterioridá a la revolución asturiana, que quiciabes nun ocupen nos trabayos historiográficos l’espaciu qu’ameriten por ser tresmitíos sobre manera de manera oral y non escrita. Refiérome, poques gracies, a cuartetes como les que podíen cantase contra la Guardia Civil nes pandorgaes, casu de la que dicía «Los que tais perahí/yá podéis tener cuidáu/porque suben perahí/los del gorru travesáu» (PEDREGAL MONTES 2007: 496); o mesmo les que podíen apaecer en periódicos como Avance: «Andan pol monte los curas/con las hijas de María,/no es extraño que la Virgen/tenga nietos algún día» (JIMÉNEZ ZAERA 2024: 392). Esta tradición popular nun ye incompatible, como bien sorrayaben Uría y Radcliff, col aprender himnos puramente proletarios al traviés de los actos políticos o de los orfeones y coros organizaos nes Cases del Pueblu, y va dar pasu tamién a coples rellacionaes colos socedíos de la revolución (BANDE 2019: 76-77; tamién GUTIÉRREZ y R. VIADO 2007: 161).
«Esistió un repertoriu popular de cantares contra’l cleru y contra les fuerces militares con anterioridá a la revolución asturiana, que quiciabes nun ocupen nos trabayos historiográficos l’espaciu qu’ameriten por ser tresmitíos sobre manera de manera oral y non escrita»
Si’l cantar de los mineros d’El Fondón ye’l más repetíu n’obres sobre la revolución asturiana, hai que sorrayar la referencia a Xuacu’l de Sama, qu’apaez n’El valle negro (CAMÍN 1979: 348) como yá lo fixera años antes na novela Los topos d’Isidoro Acevedo, ello ye, cantando asturianaes pa la so xente. El compromisu de los músicos asturianos paez qu’inspiró tamién a César M. Arconada, que nel cuentu «Xuán el músico» presentaba un gaiteru qu’un día «La Internacional tocada en su armónica no tuvo más auditorio que un mar encrespado de octubre» y al que poco depués dos tiros nun diben dexar qu’acabara l’himnu (CUEVAS 2024: 88-96). Nesti sentíu, la obra teatral Revuelta n’Asturies reflexa cómo l’acordión qu’atacaba un pasodoble y que facía baillar a les pareyes cola música, tampoco nun yera incompatible con que los mineros punxeran un discu y lu escucharan en círculu alredor o conque na sombra –pa la izquierda, tres de los espectadores– pudiera oyese aquel cantar de la «Montaña de Santander» que dicía:
En el baile nos veremos
esta tarde, morenuca;
en el baile nos veremos
y al son de la pandereta
unos bailes echaremos.
(CAMUS 2006: 85 y 103)
En fin y en pos, talo qu’escribiera’l poeta Alfonso Camín, hasta nel llugar palentín de Barruelo (d’onde procede una de les fotografíes más icóniques del ochobre del 34) «hay una calle que lleva el nombre de Manuel Llaneza. Se bebe sidra y se canta asturiano» (CAMÍN 1979: 488).
«Arriba pobres del mundo» o «Arriba parias de la tierra» son formes d’empezar dos versiones d’una mesma canción, La Internacional, que va ser la más referenciada nos testimonios escritos y orales de les xornaes revolucionaries d’ochobre, a diferencia d’otres que malapenes apaecen nes narraciones o que tan siquier se citen nes cróniques d’aquellos díes hasta onde yo sé.
Usada pa poner el ramu a mitinos o a otru tipu d’actos del movimientu obreru, cantada y interpretada por coros, gaiteros, bandes de música o polos asistentes a un café fraternal, a una romería o a una boda comunista (exemplos del mesmu 1934 con anterioridá al mes d’ochobre recoyíos en TAIBO II 2013: 47-48; tamién en RUIZ 1988: 90 y en KERRY 2024: 33), La Internacional, talo qu’escribe Matthew Kerry, yá nun yera namás un cantar d’esperanza que contribuyía a crear un sentimientu d’identidá y cohesión colectiva, «ahora estaba vinculada a la acción armada y a la victoria. Se cantó tras derrotar a los guardias civiles en Olloniego, cuando las milicias partieron hacia el frente y cuando se capturó la fábrica de armas de Trubia. Cantar La Internacional era una actuación colectiva autoconsciente de la clase obrera como sujeto revolucionario» (KERRY 2024: 131), dalgo que yá aportunara Manuel Grossi nel 1935 en La insurrección en Asturias a la de describir la entrada en Mieres del Camín: «Nuestra entrada en la población provoca un entusiasmo indescriptible. Todos los trabajadores, viejos y jóvenes, las mujeres y los niños, entonan a coro la Internacional. No es ya un canto de esperanza, sino de victoria. Me siento embargado por la emoción» (GROSSI 1978: 29).
Los testimonios rescamplen y confirmen al tiempu, na mio opinión, lo indicao por Matthew Kerry. Según el socialista Arístides Llaneza, tres d’arimase na nueche del 4 al 5 d’ochobre hasta La Mazanea y ver ónde se celebró’l combate, de siguío repliéguense los mineros hasta Lluniego en camiones que lleven banderes coloraes y cantando la canción (TAIBO II 2013: 235); el comunista Carlos Vega dizque la columna que salió’l 15 d’ochobre de Trubia partió en tren «con vivas calurosos a la Revolución, al Ejército Rojo y a los soviets, y cantando ‘La Internacional’» (TAIBO II 2013: 442), dalgo que yá fixera la columna procedente de Mieres del Camín que llegara díes primero a la redolada d’Uviéu (BENAVIDES 1935: 228). Tamién en Trubia, el 6 d’ochobre, los revolucionarios «dueños de la fábrica, en medio del silencio del resto de los obreros, pasearon su triunfo desfilando por el poblado, cantando La Internacional y dando vivas a la revolución y al comunismo» (GARCÍA GÓMEZ 2009: 177). En Sama, los montes «sintieron cómo un pueblo congregado despedía a su ejército al canto de la Internacional» (MOLINS I FÁBREGA 1977: 177). N’Uviéu, acordies cola crónica de Francisco Lucientes publicada nel Diario de Madrid el 31 d’ochobre, les milicies del Caudal qu’entren pel barriu de San Llázaro yeren un «tropel confuso, sin formación, que reemplaza su desbarajuste eficamente con un ardoroso vocerío de palabrotas y cánticos: “¡Arriba los pobres del mundo! En pie los esclavos sin pan…”» (DÍAZ NOSTY 1974: 197). Y tamién se cantó n’Avilés, claro (NAVARRO BALLESTEROS 2020: 151). Sía como quier, quiciabes el testimoniu más compartíu al respective seya’l de Manuel Grossi:
«La concurrencia en Mieres es aún mayor que en los días anteriores. Se discute apasionadamente. Del cuartel general han salido cuatrocientos soldados rojos que recorren las calles de la ciudad en orden perfecto y entonando la Internacional. Este desfile lleno de emoción a todos los que la presencian. Los ojos se llenan de lágrimas. Esos hombres han pasado días y noches sin moverse de las trincheras de la revolución. Están sucios, harapientos, cubiertos de lodo. Les ha crecido la barba. Han dormido apenas. Han conocido toda clase de privaciones. Sin embargo, en este momento decisivo, cuando ya se masca la derrota, a dos pasos quizá de la más sangrienta de las represiones, tienen fe, una inquebrantable fe en su causa, en su ideal. No lloran. Cantan. Es este canto que a través de derrotas y de victorias parciales, tienen que conducir un día no lejano a la clase trabajadora del mundo entero a su victoria definitiva, a su emancipación total» (GROSSI 1978: 110-111).
«Nun foi fácil topar testimonios escritos que referenciaren otros himnos obreros que nun fueran La Internacional. La escepción ye’l llibru Sangre de octubre y ye posible que la militancia comunista del autor esplique l’espaciu dedicáu na obra a la canción La Joven Guardia»
Otra parte de la historia que nun debemos escaecer ye que cuando nel 1936 los presos d’ochobre salen de les cárceles la xente recíbelos cantando La Internacional (TAIBO II 2013: 588). Según La Voz de Asturias, un xentíu acudió cantando a la estación del Norte n’Uviéu pa saludar al líder del SMA, Amador Fernández, que tuviera exiliáu, y de nueche tocó la banda municipal peles cais de la capital como nel meyor de los díes festivos (KERRY 2024: 167). La historiadora estaunidense Pamela Beth Radcliff recuéyelo d’esta manera:
«Y el 4 de febrero de 1936, cuando llegó un tren lleno de presos asturianos trasladados de Pamplona a Gijón, una multitud (también con mayoría de mujeres) abarrotó los andenes de la estación y llenó las calles camino de la cárcel. Cuando los presos bajaron de los camiones para entrar por las puertas de la cárcel, ellos y la multitud rompieron a cantar a coro, entonando una conmovedora versión de “La Internacional”, interrumpida por vivas a la revolución» (RADCLIFF 2004: 313).
Si de riba escribí de La Marsellesa y del Himno de Riego, tengo que reconocer que nun foi gota fácil topar testimonios escritos que referenciaran otros himnos obreros que nun fueran La Internacional. La escepción ye’l llibru Sangre de octubre y ye posible que la militancia comunista del autor esplique l’espaciu dedicáu na obra a la canción La Joven Guardia, un himnu popularizáu poles mocedaes comunistas franceses y que la UJCE adoptó nel tiempu de la Segunda República. El llibru, publicáu nel 1936, tien muncho d’épica que rescampla en párrafos como esti: «Vibran las voces, roncas y claras, en armoniosa confusión. Bajo la embriaguez del deseo incontenible de lucha que nos transfigura a todos» (NAVARRO BALLESTEROS 2020: 151). Les distintes estrofes d’esti himnu reprodúcense y chisquen la obra de Manuel Navarro, onde nun falten como indico de riba les frases épiques y precisamente ye d’esti himnu mesmo que de La Internacional de los que recoyí nel so momentu versiones n’asturianu (RODRÍGUEZ VALDÉS 2004).
Una pregunta final pa quien me llean: ¿los y les anarquistes nun cantaron naquel ochobre del 1934?.
Como recuerda David Ruiz, les páxines católiques d’El Debate ‘argumentaben’ que la degradación moral que víen na conducta de los revolucionarios yera consecuencia de la esistencia nes cuenques mineres y en Xixón de «cabarets, casinos de juego y otros lugares de vicio y libertinaje» (RUIZ 2008: 344). Ente boutade y non, nun ta de más recordar el papel de la radio naquellos años trenta y lo que fo la vida cotidiana nos quince díes de revolución obrera. Acordies col testimoniu del anarquista Fernando Solano, «la radio emitía como siempre. Había música y partidos de fútbol, y estos eran también malos indicios» (SOLANO PALACIO 1994: 52). La radio garrara puxu rápido y con muncha fuercia daquella y yá ayudaba a xenerar fama pa los y les artistes de la dómina, ente les que s’alcontraba Estrellita Castro, «popular y andalucísima artista», que naquellos díes d’ochobre taba agospiada nel Hotel Inglés, del que nun pudo salir y del que marchó pa Lleón ensin actuar nel Teatru Campoamor (RUIZ 2008: 272). Nes declaraciones a la revista Esto. Revista madrileña del Hogar y la Moda, la cantante y actriz afirmó que nun dexara de tremecer los díes que tuviera escondida nel bañu de l’habitación del hotel. Sicasí, ¡quién sabe si nun s’escuchó la voz d’ella nos discos que punxeron en Radio Asturias aquellos díes!
La novela L’home de choque de Joseph Peyré ye la primer novela que se somorguia na revolución asturiana d’ochobre del 1934. Publicada en Francia nel 1936 y traducida al inglés nesa mesma década, nun foi hasta’l 2024, 88 años depués, que pudo por fin lleese n’asturianu gracies a la traducción de Javier Martínez Concheso, publicada na colección Calume d’Ediciones Trabe. Ente los méritos lliterarios d’esta obra tán ensin dulda nenguna los de la documentación y l’ambientación, onde nun falten, poques gracies, les referencies musicales tresmitíes n’especial por Parrita, mineru andaluz y meyor amigu del Morenu, el revolucionariu protagonista de la novela de Peyré. Si nuna escena un fonógrafu «siguía dando vueltes faciendo sonar “Rocío”, el cantar de moda, penriba les quexes y los gritos» (PEYRÉ 2024: 30), Parrita apaez lo mesmo xiblando un fandanguillo que la música de Rocío, o tarariando’l cantar flamencu La paloma blanca en el jardín de jazmín. Na novela del escritor francés les ametralladores lo mesmo sonaben «con un ritmu de jazz» que «s’entretienen cantando al son de “Rocío”» (PEYRÉ 2024: 95). Y ye que cómo recuerda’l periodista Mathieu Corman, presente n’Asturies nel momentu de la insurrección, en cualquier momentu «alguien se sienta al piano e inicia un pasodoble torero» (CORMAN 2009: 134).
«Ente boutade y non, nun ta de más recordar el papel de la radio naquellos años trenta y lo que fo la vida cotidiana nos quince díes de la revolución obrera»
«”Ahora, señores, música de baile” -anunció la radio. (…). Latían en el aire cruzado de ondas las melodías de la música de baile. Entre esas melodías se fraguaba el presagio revolucionario. Cesó la música», escribe Manuel D. Benavides (BENAVIDES 1935: 54-55). Sin ser incompatible col testimoniu anterior, que pudo inspirar los mensaxes radiofónicos que se recueyen en Revuelta n’Asturies (CAMUS 2006: 87), sabemos que la radio ponía naquellos díes d’ochobre dalgo más que la música del momentu. Muncha sonadía tuvo -y sigue teniendo- la emisora de Turón, poles noticies que tresmitía pero tamién por ser dende la que los comunistes del llugar proclamaron la República de Obreros y Campesinos de Asturias. El miembru del BOC Manuel Grossi describe’l funcionamientu d’esta radio asina:
«En Turón ha sido instalada una estación de radio de onda extracorta. Tiene por objeto informar a los trabajadores sobre la marcha del movimiento de Asturias y sobre la situación en el resto de España. Este aparato de radio, el único que funciona en Asturias durante los acontecimientos, trasmite las noticias a las nueve en punto de la noche. Se empieza por las ya históricas letras UHP: Unión de Hermanos Proletarios. Un grupo de camaradas, después de repetir estas letras, entona la Internacional» (GROSSI 1978: 67).
De cualquier de les maneres, más difícil ye saber o especular al son de qué música baillaben aquellos revolucionarios «con el fusil colgado, rodeada la cintura por las cartucheras quitada a los guardias muertos» de los que fala José Díaz n’Octubre rojo en Asturias (DÍAZ FERNÁNDEZ 2023: 85).
A pesar de lo terrible y de lo siniestro, nun ye lo que vien de siguío dalgo qu’apaeza de manera frecuente nos testos de la revolución asturiana, a pesar de que les acciones represives del comandante Doval llegaran lloñe y fueran un «atropello incontrolado» n’opinión de Bernardo Díaz Nosty, qu’estudiando les irregularidaes de Doval recuerda que «para no asustar a los transeúntes (que podían escuchar los gritos de los torturados) hacía sonar un fonógrafo» (DÍAZ NOSTY 1974: 364). Nún de los meyores llibros d’historia escritos sobre la revolución d’ochobre, Pablo Gil Vico amplía y pon nomes tres d’esi gramófonu de la tortura que sonaba al altu la lleva y que tal paecía un salón de baille (TAIBO II 2013: 495): el conventu de les Adoratrices tresformárase nun centru de tortura, onde’l teniente Ossorio y el comandante España dirixíen en persona les cuelmes y con aquel aparatu buscaben enterrar l’ecu de les voces de los torturaos, pero ello «no engañó a ningún preso pero sí consiguió silenciar el dolor» (GIL VICO 2019: 214). Nun voi especular equí con qué música o músiques podíen salir de los discos puestos naquel gramófonu pero sí toi d’alcuerdo colo escrito con Paco Ignacio Taibo II tocantes que la música, cualquiera que fuere, nun fo a tapar los glayíos de los torturaos.
Igual de siniestra y escura fo la denomada -con más pingarates d’humor negru que musical- sala del orfeón, qu’apaez referenciada como escenariu del repertoriu de tortures recoyíu nel informe del diputáu socialista Fernando de los Ríos: «Por último, la llamada “sala del orfeón” tiene un campo indefinido de pruebas de tormentos: por eso la llaman sala del orfeón, porque todo el mundo “canta”» (JIMÉNEZ ZAREA 2024: 370).
«Comiéronse todes les vaques, los cerdos y les gallines. Y pa cocinar hubo que quemar la probeza de muebles que teníamos. Después, todos pasamos fame. Y los soldaos [refierse a les tropes de Bosch] tovía tienen humor pa cantar». Esti testimoniu de Leonarda González, de Vega del Rey, recoyíu en mayu del 1935 por Aurelio de Llano (DE LLANO 1935: 196), valme pa introducir agora la banda sonora de les fuerces militares gubernamentales. Ye esti autor el que narra la llegada a la capital asturiana del Tabor de Regulares:
«Los vecinos, al ver entrar por la calle de Uría esta insignia inesperada se echan a la calle vitoreando al Ejército, a Yagüe, a todos los salvadores de Oviedo. Oigo los aplausos que les tributan. Los legionarios pasan cantando la canción del legionario:
Soy valiente y leal legionario,
soy soldado de brava legión…»
La entrada de les tropes na capital d’Asturies tamién apaez na novela L’home de choque de Joseph Peyré:
«Nesi momentu, na fondura del barriu lluviosu escuchóse de repente la música de la Lexón, del terciu, con un son de fiesta árabe, un son absurdu nel que se mezclaben les flautes mores, los tambores y los tiros baxo les chispes del sol» (PEYRÉ 2024: 171).
Con un tonu tovía más entusiasta que l’usáu por Aurelio de Llano, Ángel Palomino indica que’l xeneral López Ochoa organizó desfiles tres de la toma d’Uviéu:
«Del cuartel de Pelayo salen hacia el sur de la ciudad tres batallones con bandera, banda y música. Marcha al frente de la formación el general en persona, rodeado de su Estado Mayor. Por el norte desfila briosamente la Legión, con su aparato marcial de guiones, gastadores, mascotas, cantineras, armas, cornetas y tambores. Toda la ciudad está en la calle aclamando a las tropas y a España» (PALOMINO 1998:161).
El testimoniu de Belarmino Tomás ye, sicasí, un contrapuntu a los d’Aurelio de Llano y Ángel Palomino:
«El día 14, nuestras guardias apostadas en San Lázaro oyeron a lo lejos un canturreo moruno. En un camión intentaba rebasar nuestras líneas una veintena de Regulares. Los revolucionarios les prepararon un cerco y mataron a doce. Los demás huyeron hacia la ciudad» (BANDE 2019: 72).
La represión apaez desdibuxada -cuando non invisibilizada dafechu- nes narratives progubernamentales y en realidá principió primero de que se produxera la rindición de les fuerces revolucionaries; los lexonarios y regulares con Yagüe a la cabeza yá s’aplicaran con una violencia que bien llueu espeyaron coples como esta:
Desde Cerdeño a Colloto
sin dejar a Villafría
hicieron carnicería
(RUIZ 2008: 343).
Y ye que como escribieran Albert Camus y compañía en Revuelta n’Asturies, onde ente bastidores trompetes interpreten La Bandera, pasu ente pasu les trompetes son cada vez más numberoses, vuelven les carreres, suenen tiros y «los lexonarios entren con pasu ximnásticu. Cuerpu a cuerpu. Gritos de dolor. Les trompetes, incansables y trunfantes» (CAMUS 2006: 97-98).
El discu El son nos cantares de la revolución d’ochobre de 1934 del grupu Xana de Perlora, publicáu nel 1997 y coordináu por Fernando de la Puente, ye posible que seya la compilación más completa de cantares sobre la revolución asturiana. Como indicaba al empiezu, la mayoría de los mesmos son canciones escrites, publicaes y cantaes depués de los socedíos d’ochobre, polo que s’escapen del conteníu d’esti artículu. De cualquier de les maneres, nun tien que vos caer embaxo qu’esi discu nun agota la cuestión y nel trabayu d’investigación d’otros autores siguen apaeciendo más canciones sobre l’ochobre asturianu o les mesmes con ciertes diferencies, pero tamién histories qu’informen de cómo s’espardíen les canciones. Ye’l casu de María Piedad Fernández Nava, nacida nel 1921, que recuerda cómo un militante socialista que «sabía que tolus añus díbimus Luisa y yo a cantar l’aguilandu, pero cantábimus otris cosis, díjomus él: “¿Vais dir a cantar l’aguilandu isti añu?” Y dicimus nusotras: “Sí”. Y diz él: “Pues voi aprendevus yo un cantar y vais cantalu”. Y fuimos a Lus Peralonis, allalantre, a un prau a deprendemus el son. Traíalu escritu nun papel y aprendémuslu ahí [el cantar, reproducíu de siguío, ye’l qu’empieza con “Cuando en octubre sonó en España”]» (COUCEIRO y ANTUÑA 2007: 390-92). Non menos interesante ye’l testimoniu de José María Álvarez que «recogió la siguiente letra de una canción, quien la recibió de su hermana, la cual a su vez la había encontrado en un papel que le arrojaron desde una ventana de la cárcel de Oviedo: “Después de días de gran batalla/de haber vencido a la reacción/noticias llegan de Cataluña/con la gran prueba de su traición”» (TAIBO II 2013: 470).
«Adrian Shubert da a conocer nuna nota al rodapié n’Hacia la revolución un documentu que col títulu Canciones de la revolución de octubre fai parte del Archivu del Sindicato de Obreros Mineros de Asturias y que consulta na Fundación Largo Caballero. D’esti documentu esbilla una canción onde los gallegos son identificaos cola Guardia Civil»
L’historiador Adrian Shubert da a conocer nuna nota al rodapié n’Hacia la revolución un documentu que col títulu Canciones de la revolución de octubre fai parte del Archivu del Sindicato de Obreros Mineros de Asturias y que consulta na Fundación Largo Caballero. D’esti documentu, al que nun tuvi accesu, esbilla una canción onde los gallegos son identificaos cola Guardia Civil pero a diferencia del historiador canadiense, cuento que foi escrita depués -y non durante- de la revolución, basándome nel conteníu de la lletra:
Dentro de la plaza de toros
nos querían torear
los gallegos con tricornios.
Unos daban con sables
y otros daban vergajazos
y los guardias de Galicia
nos pegaban culatazos.
(SHUBERT 1984: 84)
Otra obra bien interesante en relación colo que comento nesti apartáu ye El país del silenciu de Vanessa Gutiérrez y Beatriz R. Viado, que nos muestren cómo tovía nesti sieglu’l trabayu de campu podía rescatar testimonios como’l de Felicita Arboleya, nacida nel 1916 y natural de llugar de La Bonera (Bimenes), y que pinta bien pa poner el ramu a estes páxines:
«Cuando veníen yo sentábame a cantar lo de los rojos y dicía-yos que yera de Bimenes, que yera del puñu arriba y qu’andaba per ehí pidiendo. Ún de los cantares del so repertoriu yera esti: “Salen los obreros de La Pola Llaviana, tirando cuarteles llegaron a Nava; mataron los cures, tiraron les armes; UHP, dicíen. Salú camarada”. Y de regalu: “En el monte del Naranco/hai una h.uente que mana/sangre de los milicianos/que morrieron na batalla” y “Tengo subir al Naranco/tengo d’emplazar el cañón/y disparar contra Oviedo/y derrumbar la población”. Eso cantábenlo los rojos» (GUTIÉRREZ y R. VIADO 2007: 161).
ÁLVAREZ, Ceferino (2004): El Sindicato Único de Mineros de Asturias. KRK, Oviedo.
ÁLVAREZ FERNÁNDEZ, Luis (2010): De cómo afectó a Pravia la revolución de octubre de 1934. Azucel, Avilés.
BANDE, Ramón Lluís (2019): Cuaderno de la Revolución. Pez de Plata, Oviedo.
BENAVIDES, Manuel (1935): La revolución fue así: octubre rojo y negro. Imprenta Industrial, Barcelona.
BURGOS, Ernesto (2024): La insurrección de 1934 en las cuencas mineras. Edición del autor, Gijón.
CABEZAS, Juan Antonio (1984): Morir en Oviedo. Editorial San Martín, Madrid.
CAMÍN, Alfonso (1979): El valle negro. Edición del autor, Gijón.
CAMUS, Albert (2006): Revuelta n’Asturies, en La Ratonera, númb. 17, pp. 83-103.
CANCELLI, Mª Luisa (2010): Sangre y dinamita. Ediciones Pyeseyengo, España.
CHAVES NOGALES, Manuel; DÍAZ FERNÁNDEZ, José; y PLA, Josep (2023): Tres periodistas en la revolución de Asturias. Libros del Asteroide, Barcelona.
CORMAN, Mathieu (2009): Incendiarios de ídolos. Un viaje por la revolución de Asturias. Cambalache, Oviedo.
CORRAL, Ignacio (2023): Por qué mataron a Luis de Sirval. Renacimiento, Sevilla.
COUCEIRO GESTAL, Josefa y Severino ANTUÑA GONZÁLEZ (2007): «El ciclu festivu nel Valle L’Agüeria», en Cultures, númb. 2007, ALLA, Uviéu, pp. 335-407.
CRUZ, Rafael (2006): En el nombre del pueblo. Siglo XXI, Madrid.
CUEVAS, Iván (ed.) (2024): La revolución escrita. Semana Negra de Gijón, Xixón.
DD.AA. (1985): Octubre 1934. Siglo XXI, Madrid.
DD.AA. (2024): Asturias octubre 1934. Hechos, crónicas y testimonios. La linterna sorda, Madrid.
DE LLANO, Aurelio (1935): La revolución en Asturias, octubre de 1934. Pequeños anales de quince días. Edición del autor, Oviedo.
DEL ROSAL, Amaro (1983): 1934: El movimiento revolucionario de Octubre. Akal, Madrid.
DÍAZ, Ignacio (2023): Asturias, Octubre de 1934. Una revolución sin jefes. Prometeo Ediciones, Cornellá de Llobregat.
DÍAZ NOSTY, B. (1974): La comuna asturiana. Zero, Madrid.
GARCÍA GÓMEZ, Emilio (2009): Asturias 1934. Historia de una tragedia. Pórtico Librerías, Zaragoza.
GIL VICO, Pablo (2019): Verdugos de Asturias. La violencia y sus relatos en la revolución de Asturias de 1934. Trea, Gijón.
GROSSI MIER, Manuel (1978): La insurrección de Asturias. Júcar, Gijón.
GUTIÉRREZ, Vanessa y Beatriz R. VIADO (2007): El país del silenciu. Ámbitu, Uviéu.
JIMÉNEZ ZAERA, Jesús (ed.) (2024): Octubre 1934. Desperta Ferro, Madrid.
KERRY, Matthew (2024): Un pueblo revolucionado. El octubre de 1934 y la Segunda República en Asturias. Comares, Granada.
LAVILLA, Ignacio (2004): Los hombres de octubre. Semana Negra de Gijón, Gijón.
MATEOS, María Antonia (2007): ¡Salud, compañeras! Mujeres socialistas en Asturias (1900-1937). Ediciones Trabe, Uviéu.
MOLINS I FÁBREGA, N. (1977): UHP: la insurrección proletaria de Asturias. Júcar, Gijón.
NAVARRO BALLESTEROS, Manuel (2020): Sangre de octubre. Espuela de plata, Sevilla.
PALOMINO, Ángel (1998): 1934. La guerra civil empezó en Asturias. Planeta, Barcelona.
PEDREGAL MONTES, Mª Antonia (2007): «El ciclu festivu en Sariegu», en Cultures, númb. 15, ALLA, Uviéu.
PEYRÉ, Joseph (2024): L’home de choque. Ediciones Trabe, Uviéu.
RADCLIFF, Pamela Beth (2004): De la movilización a la Guerra Civil. Historia política y social de Gijón (1900-1937). Debate, Barcelona.
RODRÍGUEZ MUÑOZ, Javier (2010): La revolución de octubre de 1934 en Asturias. Editorial Prensa Asturiana, Oviedo.
RODRÍGUEZ VALDÉS, Rafael (2004): Llingua asturiana y movimientu obreru (1899-1937). Ateneo Obrero de Gijón, Gijón.
RUIZ, David (1988): Insurrección defensiva y revolución obrera. El octubre español de 1934. Labor, Barcelona.
RUIZ, David (2008): Octubre de 1934. Revolución en la República española. Síntesis, Madrid.
SABORIT, Andrés (1964): Asturias y sus hombres. Edición del autor, Toulouse.
SÁNCHEZ, Sarah (2003): Fact and Fiction: Representations of the Asturian Revolution (1934-1938). The Modern Humanities Research Association, UK.
SHUBERT, Adrian (1984): Hacia la revolución. Crítica, Barcelona.
SOLANO PALACIO, Fernando (1994): La Revolución de Octubre. Fundación Anselmo Lorenzo, Madrid.
TAIBO II, Paco Ignacio (2013): Asturias. Octubre 1934. Crítica, Barcelona. [Hai una reedición publicada por Hoja de Lata (Xixón, 2024)]
VILLAR, Manuel (1994): El anarquismo en la insurrección de Asturias. Fundación Anselmo Lorenzo, Madrid.
Suscríbite a les nuestres novedaes
