L’Academia de la Llingua Asturiana ta acabante de reeditar nun solu volume la serie de cuentos qu’apaecieron nos años 80 que tienen como protagonista al personaxe de Ñuberu. Con esti alcuñu tamién se conoz a Miguel Solís Santos, quien robla los sos trabayos como escritor y dibuxante con esi nome. Él foi autor d’una colección de cuentos a los que-y tengo un ciñu perespecial: L’Arcu Iris y Ñuberu (1982), Les cuatro estaciones y Ñuberu (1983), Los cazadores, los llobos y Ñuberu (1984), Los árboles, l’ocalitu y Ñuberu (1985) y Ñuberu y la paz (1987).
La mio rellación con Ñuberu vien de lloñe, de cuando escomencé’l mio activismu llingüísticu n’Avilés al faceme sociu de Conceyu Bable; él fuere ún de los fundadores d’estra asociación naquella ciudá. Con él conocimos fondamente’l nuestru país, deprendiemos a querelu y curialu, pero tamién a reivindicalu. Vivimos esperiencies de les que marquen siendo cásique adolescentes; abriónos les puertes de la so casa y convirtióla nun centru neurálxicu del asturianismu avilesín. Contaxónos el so sentíu del humor, que nunca pierde y empapa tola so obra. De la so escritura, disfrutamos de narraciones como Ástor o un ensayu pa una nueva mitoloxía, na que fai una reconstrucción mitolóxica moderna d’Asturies; Les llamuergues doraes ──primer novela curtia del Surdimientu──, na que conocimos les circunstancies vitales d’una familia burguesa de calter rural; o El trunfu prietu, cola que conocimos les consecuencies de l’ambición descomanada. Creatividá y activismu marcaron aquellos años nos que tocaba facer de too: escribir pel día y salir a apegar cartelos pela nueche, facer pancartes y entamar charres, poner al dereches la toponimia y rexistrar una petición al Conceyu, un programa de radio mañaniegu y pintaes nocherniegues…
Ñuberu foi’l gran catalizador d’aquel dinamismu asturianista avilesín y gracies a él produciéronse sinerxes que podemos rastrexar tovía anguaño. Él, en cierta midida, ye responsable de qu’una banda como Dixebra fuere posible. A mediaos de los 80 presentábame a un rapaz tamién interesáu na reivindicación llingüística que taba acabante de facer un fancín llamáu L’Esperteyu, falo de Cesáreo García ‘Maniegu’, col que diba entamar daquella milenta proyectos y acciones. Nel llar del protagonista d’esti artículu, nun momentu en que tábemos conociendo’l folk, ablucábemos colos discos que nos ponía, descubriéndonos les conexones ente clasicismu y tradición musical n’obres pa orquesta y zanfoña.
Andáu’l tiempu, el camín musical de Maniegu y míu, diba empobinar per otres siendes mui distintes. Cuando en 1987 formemos Dixebra, Ñuberu diba tar ehí tamién, collaborando en tolo que podía o se-y pidía y asistiendo a los primeros conciertos. Él fíxonos el primer dibuxu de la banda y mesmamente cartelos de conciertos, preparó la portada del discu Grie-ska ──anque la que finalmente salió foi d’Ástur Paredes── y creó’l Merucu Xusticieru qu’apaez na contraportada. Siempre xenerosu, candial, coñón, como’l so alteregu de los cuentos, Miguel Solís ye una figura a la qu’hai que reivindicar y agradecer el so llabor incansable en pro d’esa otra Asturies pola que naguamos y lluchamos.
Munchu tiempu depués de que nos conociéremos, los cuentos de Ñuberu enllenaron hores y hores de llectura compartida cola mio fía, que llegó a saber de memoria les aventures d’aquel homucu que gastaba un sombreru prietu y diba enriba d’una nube. Quiero creyer que gracies a él, los neños y les neñes d’esti país van descubrir cómo nació l’arcu la vieya, cómo son les cuatro estaciones, que los llobos nun son tan malos como los pinten, que los ocalitos quieren volver a Australia o que la paz ye más guapa qu’engarrase. Espero que dalgún día vuelva Don Ñuberu engaramitáu na so nube y nos cuente porqué la música ye tan importante y nun podemos vivir ensin ella.
Suscríbite a les nuestres novedaes
