Soníos del pasáu, ¿composiciones del futuru?: El rol de la gaita asturiana na escena musical contemporánea

N’Asturies, la gaita ta venceyada a contestos rurales y, d’esta manera, a la música tradicional que foi tresmitiéndose de xeneración en xeneración. Por eso, ye común alcontrar a esti instrumentu en dalgún de los momentos estremaos d’una romería: alborada, pasacáis, eucaristía, acompañando al baille o a l’asturianada.

Sicasí, la gaita entamó a tar presente n’agrupaciones musicales clásiques dende los años noventa del sieglu pasáu. El primer d’ellos foi José Manuel Fernández Gutiérrez Guti qu’asoleyó Nos mares del Sur (FonoAstur, 1990) xunto a los Maestros de la Orquesta Filarmónica de Santiago de Chile. Nes distintes obres siéntese como l’aerófonu asturianu tien un papel solista interpretando melodíes conocíes, como “Muñeira de Boal” o’l “Himno de Asturias”, mentanto’l resto de los instrumentos apóyenla armónicamente.

«Dalguna de les obres que se compusieron pa gaita y orquesta sinfónica siguen sintiéndose nos distintos auditorios d’Asturies como La Noche Celta de Ramón Prada»

Nesa mesma década, son dellos los compositores que s’animen a escribir obres nes que puea sentise un instrumentu como la gaita. Benito Lauret, Baldomero Álvarez Céspedes, Flores Chaviano, Ramón Prada y Manuel Fernández Avello, son dalgunos de los primeros en facelo. Caúna de les sos obres tienen el so propiu xeitu; unes apuesten por emplegar melodíes propies de la tradición, mentanto qu’otres son creaes a costafecha.

Dalguna de les obres que se compusieron pa gaita y orquesta sinfónica siguen sintiéndose nos distintos auditorios d’Asturies como La Noche Celta de Ramón Prada, que cunta, amás, con una adaptación pa banda sinfónica. Hai que destacar que, en 1998, esta obra presentóse nel Festival Intercélticu de Lorient (Philip de la Croix, Le Monde, 13-VIII-1998).

«El gruesu del repertoriu pa esti dúu de gaita y pianu son igües d’obres tradicionales»

Son munches les composiciones pa gaita y orquesta que pueden sentise anguaño gracies a plataformes de streaming (YouTube o Spotify), como “NiFe” (1995) de Flores Chaviano o “La voz de los mansos” (2006) de Yónatan Sánchez Santianes. Sicasí, otres quedaron rexistraes en grabaciones discográfiques, como asocede con Día de fiesta n’Asturias (Drummers, 1994) –onde pue sentise’l primer punteru cromáticu d’Alberto Fernández Velasco–, Asturias sinfonía natural (Fase Cuatro, 2013) o A sus ojos (Sociedad Fonográfica Asturiana, 2013). 

Nun pasa lo mesmo coles obres pa gaita y pianu. La obra qu’inaugura la xuntanza d’estos dos intrumentos ye “Carretera de Avilés” (arr. Manuel Fernández Avello) interpretada por Alberto Fernández Varillas (gaita) y Francisco Jaime Pantín (pianu) y, d’entós pacá, el númberu d’obres medra. La primera composición ex profeso pa la formación ye “Suite de les Mariñes” (2006) del yá mentáu Ramón Prada y a la que siguieron otres como “RDL’C” (2013) d’Iñaki Santianes. El gruesu del repertoriu pa esti dúu de gaita y pianu son igües d’obres tradicionales, como les publicaciones recientes de profesoráu del conservatoriu d’Uviéu Axuntábense (2022) o 10 canciones asturianes pa gaita y pianu (2023) de Xaime Arias. A diferencia del repertoriu orquestal, la presencia del conxuntu de gaita-pianu sigue tando presente na sociedá, hasta llegar a interpretar l’himnu autonómicu, arregláu por Yónatan Sánchez, na clausura del XXX Concierto de los Premios Princesa de Asturias (27-X-2022).

«Munches de les composiciones tán escaeciéndose y esto nun perxudica namás a la gaita, sinón al propiu país, yá que supón una pérdida del patrimoniu musical»

Daqué asomeyao asocede col repertoriu pa banda sinfónica y gaita, onde gracies a agrupaciones, como la Banda de Música de Pravia, incluyen al aerófonu asturianu de forma permanente na so plantiya. L’Ateneo de Mieres, dende va unos años, amuesa interés n’incluyir a la gaita ente les sos llinies pa desendolcar estrenos absolutos como “Suite asturiana” de Carmen Lorente (15-V-2021) o’l poema sinfónico 13 reyes – episodio I de Yónatan Sánchez Santianes. Esti últimu estrenóse’l 21 d’abril nel Parque Xovellanos (Mieres) xunto a la Banda de Gaites La Laguna del Torollu y recibió una ovación del públicu asistente, ente los que s’alcontraba Vanessa Gutiérrez, Conseyera de Cultura, Política Llingüística y Deporte del gobiernu asturianu.

Les obres nes que la gaita interactúa con instrumentos o agrupaciones más propios de la música académica tán teniendo una gran repercusión n’Asturies. Sicasí, munches de les composiciones tán escaeciéndose y esto nun perxudica namás a la gaita, sinón al propiu país, yá que supón una pérdida del patrimoniu musical.

Francisco López Delgado. Investigador predoctoral del Área de Música del Dpto. d’Historia del Arte y Musicoloxia de la Universidá d’Uviéu.

1 Comment

  • Daniel Meré
    08/05/2024

    Norabona pol artículo Kiko, muy interesante y necesariu!

Dexa un comentariu

X