Gaiteros del Carbón entama una campaña de micromecenalgu pa celebrar el so X Aniversariu

La banda de les cuenques mineres busca finananciación pa un conciertu especial, una esposición retrospectiva y materiales conmemorativos

La banda Gaiteros del Carbón, nacida nes cuenques mineres y referente de la música tradicional asturiana, cumple diez años y quier celebralo con una propuesta abierta a tol públicu. Al traviés d’una campaña de micromecenalgu en Verkami, el grupu busca sofitu pa financiar un conciertu d’aniversariu, una esposición de la so trayectoria y la creación de productos conmemorativos que caltengan viva la memoria d’esti camín compartíu.

“Queremos celebrar estos diez años como se merecen: cola xente que nos acompañó y colo que sigue creyendo na música asturiana”, esplica Pablo Carrera, director de la formación. Pa ello entamen esta campaña de financiación na que va haber recompenses «con alma minera» ente les que s’inclúi un póster del X Aniversariu diseñáu por Sergio Llunik; gorres bordaes y camisetes d’edición llimitada; almanaques, botelles de sidra conmemoratives y productos artesanales creaos pa la ocasión; y recompenses especiales con materiales únicos, como’l cascu mineru o’l fatu.

“Facemos un llamamientu a tola xente: ayúdanos a financiar el conciertu y la esposición del nuesu X Aniversariu”, resumen Gaiteros del Carbón, una banda que dende’l so estrenu en 2016 llevó la so música per decenes d’escenarios, feries y festivales, collaborando con artistes como Celtas Cortos, Marisa Valle Roso, Los Berrones o Dixebra. Acullá de la faceta musical, la banda convirtióse nun símbolu del arguyu de les cuenques mineres, del trabayu colectivu y del valor de la cultura como elementu d’identidá.

Conciertu especial

Nesta celebración la esposición conmemorativa va amosar semeyes, indumentaria, instrumentos y recuerdos d’estos diez años, demientres que’l conciertu especial reunirá a la banda al completu con collaboraciones y un repertoriu preparáu pa la ocasión.

Llista d'espera Vamos informate cuando recibamos unidaes. Por favor déxanos embaxo una dirección válida de corréu electrónicu.