«Cuando compunxi ‘Xatu’ tuvi duldes, pero a la fin acabé por sentime mui cómodu con él»

Esti vienres 7 de payares a les 19h tien llugar nel Teatru Vital Aza de La Pola L.lena la gala final del XVII Premiu Camaretá al Meyor Cantar, l’únicu premiu institucional qu’esiste anguaño pa da-y reconocimientu a la música contemporánea fecha n’asturianu o gallego-asturianu. Lïbre con ‘L’ablugada‘, Herbamora con ‘Eclipse total‘, Ferla Megía con ‘Xatu‘ y Héctor Braga con ‘Valiente‘, son los cuatro proyectos y cantares nominaos nesta edición. Dende MUSICASTURIANA.COM vamos falar esta selmana cada día con ún de los artistes nominaos p’afondar na so participación nel gallardón.

Rematamos el cuestionariu con Ferla Megía, artista que trabaya cola música tradicional, urbana y electrónica. Crea atmósferes con una variedá mui amplia de samples y inspiraciones y la so capacidá innata pa la melodía vese rematada con una puesta n’escena onde xuega con bases qu’aporten capes y que se sumen al panderu y la flauta, encargaos de tener pelos cantares. Trátase d’una figura que vive la música ensin llendes y, claramente, una de les más inquietes de la escena asturiana, trabayando penriba d’un paragües d’abondes varielles y que bebe mesmo de los últimos soníos urbanos como de la música tradicional de so tierra.

¿Qué supón pa ti la nominación nesti premiu y qué supondría ganalu?

Igual que l’añu pasáu, supón un sofitu non namás pal mio proyeutu, sinón pa proyeutos o artistes qu’orienten la so musica a dellos estilos onde fai falta que l’asturianu s’emplegue dafechu; estilos tamién más consumíos por una mocedá que cuando entama a crear tien de referencia a artistes más de Madrid. Ganalu supondria l’emburrie definitivu pa llanzame a vivir d’esto. Pa siguir creando y puxando pola causa.

¿Por qué escoyisti esti cantar pa concursar?

Porque ye temón de cuidao. Ta feo que lo diga eh, pero ¿cómo nun vas mover el culu con él? Una pena qu’el publicu del Camaretá vaya tar sentáu ajajajajaja. Fuera coñes, cuando me punxi a componelu (con Tokischa de referencia) pensé “wow espero que-y preste a la xente… porque ye demasiao”. Pero a la fin acabé por sentime mui cómodu con él. Inda asina creo que va tar complicáu competi-y el premiu a Herbamora, Lïbre o Héctor Braga; los sos temes tamién son la ostia.

¿Tienes daqué especial preparao pa l’actuación del domingu?

Voi dar el mesmu ánimu y ganes que siempre. Suel ser el cantar caberu de cada actuación mia. Pero esta vez voi sentir el fueu dende l’entamu.